Մակրոնն ասել է, որ Իտալիայի հետ վերջին դիվանագիտական «բախումները» լուրջ բնույթ չեն կրում
Ֆրանսիայի նախագահ Էմանուել Մակրոնը, անդրադառնալով Իտալիայի ղեկավարության հետ դիվանագիտական «բախումներին», ընդգծել է, որ դրանք լուրջ բնույթ չեն կրում ու պետք է հաղթահարվեն հանուն Եվրոպայի բարօրության:
Ինչպես նշում է The Guardian-ը, նախագահն այս մասին ասել է իտալական Rai 1 հեռուստաալիքին տված հարցազրույցում:
Հայտնի է, որ նախորդ ամիս Ֆրանսիան Հռոմից հետ էր կանչել իր դեսպանին, քանի որ Իտալիայի փոխվարչապետեր Մատեո Սալվինին և Լուիջի դի Մայոն մի շարք հարցերով քննադատել էին ֆրանսիական իշխանություններին:
«Մեր միջև չհասկացվածություն կար: Հնչել են որոշ ավելորդ հայտարարություններ, սակայն այս անկայուն վիճակը լուրջ չէ: Մենք պետք է հաղթահարենք սա»,-ասել է Մակրոնը:
Ֆրանսիայի նախագահը խոսել է նաև Իտալիայի նկատմամբ իր սիրո մասին՝ ընդգծելով, որ ամենաշատը սիրում է Նեապոլ քաղաքը, ինչպես նաև իտալացի դերասան, դրամատուրգ և հեղինակ Էդուարդո դե Ֆիլիպոյին:
«Ապագա կնոջս հանդիպել եմ Դե Ֆիլիպոյի աշխատանքներն ուսումնասիրելիս»,-մանրամասնել է Ֆրանսիայի նախագահը: