Եգիպտոսի Գերագույն իմամն անվանել է բազմամուսնությունը կանանց նկատմամբ անարդարություն
Եգիպտոսի Գերագույն իմամ շեյխ Ահմեդ ալ Թայիբն աղմկահարույց հայտարարություն է արել, որն առաջացրել է հակասական արձագանքներ, հաղորդում է Associated Press-ը:
Մասնավորապես, իմամը հայտարարել է, որ բազմամուսնությունը «անարդարություն» է կանանց նկատմամբ:
Նա ընդգծել է, որ «նրանք, ովքեր հայտարարում են, որ ամուսնությունը պետք է պոլիգամ լինի, սխալվում են»:
Ինչպես գործակալությունը մեջբերել է Գերագույն իմամի խոսքերը, «Եթե չկա արդարություն, մեկ կնոջից ավելին արգելվում է»:
Նա հավելել է, որ բազմամուսնությունը սկիզբ է առնում «Ղուրանը եւ մարգարեի ավանդույթները ոչ բավարար չափով ընկալելու» հետեւանքով:
Հեռուստաեթերում արված Գերագույն իմամի այդ հայտարարությունն առաջացրել է թեժ քննարկումներ սոցցանցերում, իսկ ոմանք նույնիսկ կոչ են արել արգելել բազմամուսնությունը:
Ավելի ուշ «Ալ-Ազհարը» պարզաբանել է, որ իմամն ամենեւին կոչ չէր անում արգելել բազմամուսնությունը: