Տիմոշենկոն խոստացել է ընտրվելու դեպքում վերադարձնել ԽՍՀՄ ավանդները
Ուկրաինայի նախագահի թեկնածու, «Բատկիվշչինա» կուսակցության առաջնորդ Յուլիա Տիմոշենկոն խոստացել է ընտրվելու դեպքում սկսել ԽՍՀՄ ավանդների դիմաց փոխհատուցման տրամադրման գործընթաց: Այդ մասին հայտնում է РИА Новости-ն:
Աղբյուրի հաղորդմամբ` Տիմոշենկոն ընտրողներին հիշեցրել է, որ վարչապետի պաշտոնում ինքը սկսել էր ավանդների վերադարձի ծրագիրը, և քաղաքացիների մի մասը ստացել է իր խնայողությունները, սակայն հաջորդ իշխանությունը «փակել էր ծրագիրը»:
«Իշխանությունները չցանկացան, որ երկրում արդարություն կինի»,- նշել է Տիմոշենկոն:
Նա վստահեցրել է, որ ընտրություններում հաղթանակի դեպքում ոչ ոք իրեն չի խանգարի վերադարձնել քաղաքացիներին խորհրդային ժամանակաշրջանի ավանդները:
Հիշեցնենք, որ Ուկրաինայում նախագահական ընտրությունները տեղի կունենան 2019-ի մարտի 31-ին: Նախագահի պաշտոնի համար պայքարում է ավելի քան 40 թեկնածու: