«Թուրքիայի հետ ունենք տնտեսական ու քաղաքական խնդիրներ, որոնք անտեսել չենք կարող». Եվրահանձնաժողովի փոխնախագահ
Թուրքիայի՝ Եվրամիությանն անդամակցության շուրջ բանակցությունները չեն ավարտվել, սակայն այս պահին դրանք ժամանակավորապես դադարեցված են: Այդ մասին հայտարարել է Եվրահանձնաժողովի փոխնախագահ Յուրկի Կատաինենը, որն այցելել է Անկարա՝ Եվրամիություն-Թուրքիա տնտեսական երկխոսության համաժողովի շրջանակում:
Ինչպես գրում է Euronews-ի թուրքական ծառայությունը, Կատաինենը նշել է, որ ԵՄ-ն մշտապես պատրաստ է խորացնել առկա համագործակցությունն ու շարունակել երկխոսությունը:
«Անշուշտ, ունենք նաև տնտեսական ու քաղաքական որոշ խնդիրներ, որոնք անտեսել չենք կարող», - ասել է պաշտոնյան:
Նա միևնույն ժամանակ ուշադրություն է հրավիրել այն փաստի վրա, որ ԵՄ-ն և Թուրքիան մի շարք ոլորտներում ունեն նաև ընդհանուր խնդիրներ, օրինակ՝ անվտանգության, ահաբեկչության դեմ պայքարի, միգրացիոն ճգնաժամի հետ կապված:
Նշենք, որ Թուրքիան ԵՄ անդամ դառնալու հայտ է ներկայացրել 1987 թվականին և դարձել անդամակցության թեկնածու 1999-ից։