Օդաչուն 20 տարի շարունակ թռիչքներ է կատարել կեղծ արտոնագրով

Հարավ-Աֆրիկյան ավիաուղիների օդաչու Ուիլյամ Չանդլերը հեռացվել է աշխատանքից, երբ բացահայտվել է փաստը, որ ավելի քան 20 տարի նա թռիչքներ էր կատարում կեղծ արտոնագրով, հաղորդում է BBC News-ը:

Ինչպես հայտնել են Հարավ-Աֆրիկյան ավիաուղիներում, օդաչուի փաստաթուղթը կեղծված էր:

Չանդլերի մասնագիտական պիտանիության մասին կասկածներն ի հայտ էին եկել թռիչքներից մեկի ժամանակ տեղի ունեցած միջադեպի արդյունքում. ինչպես գրում են հարավ-աֆրիկյան ԶԼՄ-ները, ինքնաթիռը, որը կառավարում էր Չանդլերը, կատարում էր «տարօրինակ շրջադարձեր» շվեյցարական Ալպերի երկնքում:

Ավիաուղիները ներկայացրել էին Չանդլերին մի շարք մեղադրանքներ:

Նշվում է, որ կասկածվում է նաեւ Ավիաուղիների անվտանգության ծառայության սպան, որը, ենթադրաբար, փորձում էր թաքցնել ղեկավարությունից օդաչուհի կեղծ արտոնագրի փաստը:

Հարավ-աֆրիկյան Mail & Guardian (M&G) թերթը գրել է, որ մինչ 1994 թվականին օդաչու դառնալը Չանդլերն աշխատում էր որպես ավիացիոն ինժեներ:

Հարավ-Աֆրիկյան ավիաուղիների հայտարարության մեջ նշվում է, որ հետաքննության արդյունքում պարզ է դարձել, որ Չանդլերն ուներ միայն կոմերցիոն օդաչուի արտոնագիր: Ավելի ուշ նա հեռացվել է աշխատանքից:

Ընդ որում՝ Ավիաուղիները պահանջում են օդաչուից տրանսպորտային ինքնաթիռներով երկարատեւ միջազգային թռիչքներ կատարելու արտոնագրի առկայություն: Դա ստանալու համար օդաչուները պետք է հանձնեն մի շարք տեխնիկական քննություններ եւ անցնեն բժշկական հետազոտություններ:

Արտոնագրի տերերը պետք է ամեն տարի «թարմացնեն» իրենց փաստաթղթերը:

Արդյունքում պարզ էր դարձել, որ օդաչուն մոլորեցրել էր իր գործատուներին՝ որոշակի մակարդակի արտոնագիրը ներկայացնելով այլ մակարդակում: