Իսրայելի գլխավոր դատախազը մտադիր է Նեթանյահուի դեմ կոռուպցիոն մեղադրանքներ ներկայացնել
Իսրայելի գլխավոր դատախազ և կառավարության իրավաբանական գծով խորհրդական Ավիհայ Մանդելբլիտը հայտարարել է երկրի վարչապետ Բենյամին Նեթանյահուի նկատմամբ կոռուպցիայի վերաբերյալ մեղադրանքներ ներկայացնելու մտադրության մասին:
Ինչպես հաղորդում է tass.ru-ն՝ Իսրայելի պետական ռադիոյին հղումով, նախքան մեղադրանքների ներկայացումը պարտադիր կերպով պետք է նախնական նախադատական լսումներ անցկացվեն: Այդ լսումների ընթացքում Նեթանյահուին հնարավորություն կտրվի համոզել դատախազին իր դեմ մեղադրանքներ չներկայացնել:
Վարչապետի «Լիկուդ» կուսակցության անդամները գլխավոր դատախազի որոշումը որակել են «քաղաքական հետապնդում»՝ հայտարարելով, որ դրա նպատակներից մեկն է տապալել Նեթանյահուի կառավարությունն ու նոր ձախակողմյան ուժերից բաղկացած կառավարություն ստեղծել:
Հայտնի է, որ ինքը՝ Նեթանյահուն, որը 2017-2018թթ. ոստիկանության կողմից հարցաքննվել է կոռուպցիոն գործերում ներգրավված լինելու կասկածներով, հերքել է բոլոր մեղադրանքները: