13-ամյա աշակերտը կրակել է համադասարանցուն
Սլովակիայի արևելյան շրջանում գտնվող Սպիշսկա-Նովա-Վես քաղաքի միջնակարգ դպրոցներից մեկի աշակերտը չորեքշաբթի ատրճանակից կրակել է իր համադասարանցու վրա՝ գլխից վիրավորելով նրան: Այս մասին հաղորդում է РИА Новости-ն՝ հղում անելով բրատիսլավական հեռուստաալիքին:
«Երկու աշակերտն էլ 13 տարեկան են: Նրանց միջև ծագած վիճաբանության պատճառը դեռևս հայտնի չէ: Վիրավոր աշակերտին բժիշկները տեղում օգնություն են ցույց տվել, որից հետո տեղափոխել են տեղի հիվանդանոցներից մեկը», - հաղորդել է հեռուստաալիքը՝ վկայակոչելով բուժծառայություններին: Այլ մանրամասներ հետագա գործողություններից չեն հաղորդվել: