«Ուկրաինան եվրոպականի անվան տակ ռուսական գազ է ներմուծում». Տիմոշենկո

Ուկրաինայի նախագահի թեկնածու, «Հայրենիք» կուսակցության ղեկավար Յուլյա Տիմոշենկոն հայտարարել է, որ վերջին 5 տարում Ուկրաինան երբևէ չի հրաժարվել ռուսական գազի գնումից:

Ըստ քաղաքական գործչի՝ երկրի իշխանությունները մշակել են մեխանիզմներ, որոնց շնորհիվ ռուսական գազը կարողանում են ներմուծել եվրոպականի անվան տակ, գրում է «ՌԻԱ Նովոստի» գործակալությունը:

«Ես սա ուղղակի չեմ ասում, ես պատրաստ եմ փաստաթղթերով ապացուցել դա, և այս ստի համար պատասխան է տալու յուրաքանչյուրը: Այս 5 տարիների ընթացքում Ուկրաինա է ներմուծվել ռուսական ծագման գազ»,- ասել է ընդդիմադիր քաղաքական գործիչը:

Ուկրաինայի նախկին վարչապետը նաև նշել է, որ եթե երկրի գործող նախագահ Պյոտր Պորոշենկոն վերընտրվի, Ուկրաինայում կենցաղային գազի գինը կաճի 43 տոկոսով:

«Քողարկվելով հայրենասիրական կոչերով՝ նրանք ծրագրել են կրկին բարձրացնել գազի գինը՝ մայիսի 1-ից 15 տոկոսով, իսկ դեկտեմբերի վերջից՝ ևս 25 տոկոսով: Ընդհանուր առմամբ, 43 տոկոս՝ մեկ տարվա մեջ»,- ասել է Տիմոշենկոն:

Հիշեցնենք, որ 2015 թվականի նոյեմբեր ամսից պաշտոնական Կիևը հրաժարվել է ռուսական վառելիքի գնումից: