Մադուրոն հրամայել է ձերբակալել լրագրողներին, որոնց հարցերն իրեն «դուր չեն եկել»
Univision հեռուստաալիքի՝ Վենեսուելայի նախագահ Նիկոլաս Մադուրոյի հետ հարցազրույց անցկացնող լրագրողներին ձերբակալել են այն պատճառով, որ նախագահին դուր չեն եկել նրանց հարցերը:
«Երկրի ղեկավարին դուր չեն եկել լրագրողների հնչեցրած հարցերը, և նա հրամայել է դադարեցնել ձայնագրությունը, բռնագրավել տեխնիկան և ձերբակալել 6 լրագրողներին»,- ասված է հեռուստաընկերության հաղորդման մեջ:
Դեպքը տեղի է ունեցել Կարակասում գտնվող Միրաֆլորես նախագահական պալատում: Լրագրողներից մեկը զանգահարել է հեռուստաալիք՝ ձերբակալության մասին հայտնելու, սակայն խոսակցության կեսից նրա բջջայինը վերցրել են:
Հեռուստաալիքի ղեկավարությունը կապ է հաստատել ԱՄՆ Պետքարտուղարության հետ, որտեղից կոչ են արել անմիջապես ազատ արձակել լրագրողներին:
Վենեսուելայի տեղեկատվության նախարար Խորխե Ռոդրիգեսը թվիթերյան իր էջում գրառում է կատարել՝ նշելով, որ Միրաֆլորես պալատը միշտ լավ ընդունելության է արժանացրել լրագրողներին, սակայն դեմ է «էժանագին շոուներին»:
Լրագրողներն արդեն ազատ են արձակվել, սակայն նրանց տեխնիկան չի վերադարձվել, հարցազրույցի ձայնագրությունը՝ նույնպես: