Բոլիվիայի նախագահը հայտարարել է, որ Մադուրոն կարող է սպանվել
Բոլիվիայի նախագահ Էվո Մորալեսը հայտարարել է, որ իր վենեսուելացի պաշտոնակից Նիկոլաս Մադուրոն կարող է սպանվել: Այս մասին գրում է Life.ru-ն՝ ABI գործակալությանը հղումով:
«Այն բանից հետո ինչ նրանք (ԱՄՆ-ը և իր դաշնակիցները – Tert.am) ձախողվեցին, ի՞նչ է հիմա ասում Պոմպեոն: Նա ասում է. «Մադուրոյին հաշված օրեր են մնացել»: Նախորդ գիշեր մի ամերիկացի սենատոր ասաց. «Մադուրոն պետք է սպանվի»», - նշել է Մորալեսը:
Նրա խոսքով՝ եթե Վենեսուելայի նախագահին որևէ բան պատահի, ապա դրա համար պատասխանատվության պետք է ենթարկվեն ԱՄՆ պետքարտուղար Մայք Պոմպեոն և սենատոր Մարկ Ռուբիոն:
Հիշեցնենք, որ Վենեսուելայում հունվարից զանգվածային բողոքի ցույցեր են սկսվել՝ ընդդեմ երկրի գործող նախագահ Նիկոլաս Մադուրոյի: Ընդդիմադիր խորհրդարանի նախագահ Խուան Գուաիդոն իրեն հռչակել է երկրի ժամանակավոր նախագահ:
ԱՄՆ-ը և մի շարք այլ երկրներ աջակցություն են հայտնել ընդդիմադիր առաջնորդին, սակայն կան մի շարք երկրներ, որոնք իրենց աջակցութունն են հայտնել Մադուրոյին: