«Հրաշալի «ուիքենդ» ԱՄՆ-ի և Չինաստանի համար». Թրամփը հետաձգել է չինական ապրանքների ներկրման համար 200 մլրդ դոլարի մաքսատուրքերի սահմանումը
Միացյալ Նահանգների նախագահ Դոնալդ Թրամփը հետաձգել է չինական արտադրության ապրանքների ներկրման համար նախատեսված 200 մլրդ դոլարի չափով մաքսատուրքերի սահմանումը:
Ինչպես նշում է Daily Mail-ը, Թրամփն ընդգծել է, որ դա անում է Չինաստանի հետ «առևտրային պատերազմից» խուսափելու համար:
ԱՄՆ նախագահի խոսքով՝ շուտով ինքն ու Չինաստանի ղեկավար Սի Ձինփինը մաքսատուրքերի ու առևտրային հարաբերությունների հարցով հանդիպում ունենան «Մար ա Լագո»-ում: Թրամփը հույս ունի, որ հանդիպման արդյունքում երկու տնտեսական գերտերությունների միջև համաձայնագիր կկնքվի:
ԱՄՆ նախագահն այս մասին հայտնել է իր թվիթերյան միկրոբլոգում:
«Ուրախությամբ հայտնում եմ, որ ԱՄՆ-ն էական առաջընթաց է արձանագրել Չինաստանի հետ առևտրային բանակցություններում: Եվ այդ արդյունավետ բանակցությունների արդյունքում, ես մինչ մարտի 1-ը կհետաձգեմ մաքսատուրքերի սահմանումը: Հետագա առաջընթացի ակնկալիքով ես և Սի Ձինփինը կհանդիպենք «Մար ա Լագո»-ում, որպեսզի համաձայնության գանք: Շատ լավ «ուիքենդ» էր ԱՄՆ-ի և Չինաստանի համար»,-գրել է նախագահը: