ԿԺԴՀ-ը դեռեւս միջուկային վտանգ է ներկայացնում. Պոմպեո
ԿԺԴՀ-ը շարունակում է ներկայացնել միջուկային վտանգ: Այդ մասին կիրակի CNN հեռուստաընկերության եթերում հայտարարել է ԱՄՆ-ի պետքարտուղար Մայք Պոմպեոն, հաղորդում է ՏԱՍՍ-ը:
Հարցին՝ շարունակո՞ւմ է արդյոք Փհենյանը ներկայացնել միջուկային զենք կիրառելու սպառնալիք, Պոմպեոն վճռականորեն պատասխանել է. «Այո»:
Նա անվանել է ոչ այնքան ճշգրիտ կարծիքը, որ ԱՄՆ-ի նախագահ Դոնալդ Թրամփն ունի այլ տեսակետ: «Նա նկատի ուներ, որ Սինգապուրում գործադրվող ջանքերը եւ Կիմի որդեգրած պարտավորությունները զգալիորեն իջեցրել են ամերիկյան ժողովրդի նկատմամբ վտանգի մակարդակը: Միացյալ Նահանգների պետքարտուղարի եւ նախագահի խնդիրն ամերիկյան ժողովրդի անվտանգությունն ապահովելն է: Մենք պատրաստվում ենք իրագործել այն նպատակը»,-պարզաբանել է պետքարտուղարը:
Պոմպեոն վստահեցրել է, որ Թրամփի վարչակազմը համոզված է, որ ավելի վաղ ԿԺԴՀ-ի ղեկավարությունը խուսափում էր կատարել միջուկային զինամթերքի ոլորտում իր ստանձնած պատրավորությունները: «Մենք գիտենք պատմությունը, գիտենք, որ Հյուսիսային Կորեան ստում էր, տալիս էր սին խոստումներ եւ վերցնում էր Ամերիկայի փողերը…Մեր վարչակազմն այլ ուղղություն է բռնել եւ քննադատվել է հենց այդ պատճառով»,-շարունակել է նա՝ վստահություն հայտնելով, որ հենց Թրամփը եւ Կիմ Չեն Ինն այն քաղաքական գործիչներն են, որոնք «ունակ են կատարել քայլ առաջ՝ դեպի Հյուսիսային Կորեայի լիարժեք եւ ստուգելի ապամիջուկայնացումը»:
Պետքարտուղարը նշել է, որ միջուկային զենքը պահպանելու դեպքում ԿԺԴՀ-ը հետագայում չի կարողանա առեւտրով զբաղվել եւ զարգանալ:
ԱՄՆ-ի նախագահի եւ ԿԺԴՀ-ի առաջնորդի՝ պատմության մեջ առաջին գագաթնաժողովը կայացել էր անցած տարի՝ հունիսի 12-ին, Սինգապուրում: Արդյունքում Դոնալդ Թրամփն ու Կիմ Չեն Ինը ստորագրել էին փաստաթուղթ, որում Փհենյանը պատրավորվել էր ապամիջուկայնացնել Կորեական թերակղզին՝ փոխարենը Վաշինգտոնի կողմից ստանալով անվտանգության երաշխիքներ: Ակնկալվում է, որ նրանց երկրորդ հանդիպումը կկայանա Վյետնամի մայրաքաղաքում փետրվարի 27-28-ին: