ՀՀԿ-ը հակված է երկխոսություն սկսել, բայց օդանավակայանը փակելով խնդիրը չի լուծվի. Ալիկ Սարգսյան
ԱԺ «Հայաստանի Հանրապետական կուսակցություն» խմբակցության պատգամավոր Ալիկ Սարգսյանը, լրագրողների հետ զրույցում անդրադառնալով բողոքի ցույցերին, ասաց, որ ՀՀԿ-ը հակված է երկխոսություն սկսել՝ ճգնաժամը հաղթահարելու նպատակով, և ցուցարարները, ցույցը նախաձեռնողները, պետք է գան երկխոսության։ Ըստ նրա՝ պայքարի ընտրված մեթոդները ճիշտ չեն, և ստեղծված իրադրությունում հնարավոր չէ խնդիրը լուծել։
«Բայց օդանավակայանը փակելո՞վ, հազար տեսակ հարց կա, էս ի՞նչ է կատարվում, մարդիկ ճամպրուկներով Իսակովի պողոտան են անցնում, սա անելու բան չէ»,- ասաց նա և նշեց, որ բացի պարալիզացնելուց երկիրը, այլ վտանգներ չեն տեսնում:
Լրագրողների հարցին, թե ինչ առաջարկով են երկխոսության կանչում, Ալիկ Սարգսյանն ասաց, որ չի տեսնում երկխոսության ցանկություն Նիկոլ Փաշինյանի կողմից, այլ միայն պահանջ ու ուլտիմատում:
Ալիկ Սարգսյանը նշեց, թե հասկանում է ժողովրդի պահանջները: «Փաշինյանը չլիներ, Պողոսյանը լիներ, կարող է այս վիճակը լիներ, հարցը դրանում չէ, ուղղակի ես տեսնում եմ, որ պետք է լուծում ստանա հարցը, այսօր պարալիզացվել են բոլոր հիմնարկները»:
Լրագրողների հարցին, թե բացառո՞ւմ է, որ մեկ շաբաթվա ընթացքում հնարավոր է ՀՀԿ-ն պառակտվի, Ալիկ Սարգսյանը նշեց, թե առայժմ նման բան չի տեսնում և չի էլ մտածում: «Ինչ բառ սկսում է «դ» տառով, այսինքն՝ դավաճանություն, ես այդ հարցում չկամ, մոռացեք»,-ասաց նա, չցանկանալով գնահատական տալ ՀՀԿ պատգմավոր Ֆելիքս Ցոլակյանի՝ կողմ քվեարկությանը: ՀՀԿ պատգամավորն ասաց, որ ամեն դեպքում ինքը չէր անի: «Աշխարհի վերջը գա, ես թիմ չեմ դավաճանի, կդնեմ մանդատս, կգնամ տուն, բայց թիմիս չեմ դավաճանի»,-ասաց նա:
Ըստ Սարգսյանի՝ ինքը ռեալ քաղաքական գործիչ է, լավ գնահատում է իրավիճակը, գուցե մի օր այս ամենին ռեալ գնահատական կտա: «Ոչ մի քաղաքական լիդեր թող իր վրա չվերցնի, այս շարժումը, այսպես թե այնպես, մի օր պետք է լիներ, սա հասունացել էր, ես հիմա ընդամենն առաջարկում եմ թող անհրաժեշտ հետևություն անեն, մի ջնջեք անցյալը, հասկանում եմ երիտասարդությանը, նրանք ոչ միայն մեր ապագան են, այլ ներկան, վատ հետևանքներ կլինեն»,-ասաց նա:
Իսկ, թե ինչ վատ հետևանքներ կարող են լինել, ասաց, թե ինքը նկատի չունի իշխանության կողմից ճնշում, այլ իր անհանգստությունը երկրի անվտանգությունն է: «Մի տարեք երկիրը փորձության»,-ասաց նա։
Ի դեպ, նա նշեց, որ ինքը ոչ մի խնդիր չունի մարդկանց մեջ դուրս գալու համար: «Ես էլ եմ իմ հարազատների, բարեկամների մոտ հաշվետու իմ արարքի համար: Ես իրիկունը պետք է տուն գնամ ու երեխաներիս բացատրեմ, թե ինչու եմ այս բանն արել: Ես այն քաղաքական գործիչը չեմ, որ ասեմ՝ քաղաքական նկատառումներով և այլն, բայց ես ընդդիմություն էլ չեմ, որ ասեմ՝ իմ ազգուտակիս վնասեն, չգիտեմ ինչ, զրկանքներ, ես մեջտեղի մարդ եմ, ոչ վատ իմաստով, որ ամեն ինչ լինի, ինչպես և կարգն է, և օրենքներն են պահանջում, և կարևոր օրենքը՝ չգրված մարդկային օրենքը: Երեխեքս այս երկում ապրելու են, ես էլ քայլելու եմ մարդկանց մեջ ու հենց հիմա էլ, ես ոչ մեկից փախնելու, թաքնվելու խնդիր չունեմ, որովհետև խիղճս հանգիստ է, ինձ ոչ մեկը չի կարող մեղադրել, ինչ իշխանություն էլ փոխվի, ես ապրել եմ նենց, որ իմ ոչ մի արարքի համար չեմ ամաչում և պատասխանատվության որևիցե խնդիր չունեմ, ամենափոքր, որովհետև մաքուր եմ ապրել, գիշերն էլ, որ վերլուծում, հետ եմ գնում սրանից 8 տարի առաջ կարող է արել եմ, որի համար պետք է պատասխան տամ, չունեմ նման հարց, հանգիստ ապրում եմ»,- ասաց նա: