Ապահովագրության առանցքային այս բարեփոխման փուլում կրկնապատիկ մեծ է ձեր դերը. Ավանեսյանի ուղերձը Բուժքույրերի մասնագիտական օրվա առթիվ

ՀՀ առողջապահության նախարար Անահիտ Ավանեսյանը ուղերձ է հղել Բուժքույրերի մասնագիտական օրվա առթիվ:
 
«Սիրելի՛ բուժքույրեր, քույրական գործի նվիրյալներ,
 
Սրտանց շնորհավորում եմ մասնագիտական օրվա առթիվ: Դուք առանցքային դեր ունեք բուժօգնության կազմակերպման ու տրամադրման գործում:
 
Թե՛ առողջության առաջնային պահպանման, թե՛ հիվանդանոցային օղակում դուք եք հոգ տանում բուժառուներին, աջակցում նրանց այն պահին, երբ դրա կարիքը կա՝ ստեղծելով վստահության ու ջերմ մթնոլորտ:
 
Ապահովագրության առանցքային այս բարեփոխման փուլում կրկնապատիկ մեծ է ձեր դերը, աշխատանքը, ջանքը, ինչի համար երախտիքի խոսքերս եմ ուզում ձեզ հայտնել՝ փոխանցելով նաև մեր քաղաքացիների գոհունակ ու շնորհակալ խոսքերը:
 
Ապահովագրության շրջանակում ձեր կատարած աշխատանքի դիմաց փոխհատուցումները որոշ մասով վերանայված են, սակայն դրանով, վստահաբար, չենք սահմանափակվելու:
 
Գիտեմ, որ այսօր բոլոր բուժհաստատություններում լինելու են միջոցառումներ, Երևանում` կրթական ու պարգևատրման միջոցառում, որին հարգելի պատճառով, չեմ կարող ներկա լինել:
 
Շնորհավորում և ջերմ գրկում եմ յուրաքանչյուրիդ անհատապես»,- ասվում է ուղերձում: