Թուրքիան եւս պատվաստանյութ է մշակել կորոնավիրուսի դեմ

Նոր կորոնավիրուսի դեմ թուրքական պատվաստանյութի՝ Turkovac-ի մշակման գործընթացը հասել է այն փուլին, երբ կարելի է դիմել արտակարգ օգտագործման համար: Այս մասին երեկ հայտարարել է Թուրքիայի առողջապահության նախարար Ֆահրեթին Քոջան՝ հիշեցնելով, որ ավելի վաղ դեղամիջոցի արտադրությունը հաստատվել էր երկրի ձեռնարկություններից մեկում, հաղորդում է Anadolu-ն:

Նրա խոսքով՝ Թուրքիայում ստեղծվել է ենթակառուցվածք, որը թույլ է տալիս գործարկել Turkovac-ի զանգվածային արտադրության երկրորդ ձեռնարկությունը:

Turkovac պատվաստանյութը մշակվել է Erciyes համալսարանի գիտնականների կողմից՝ Թուրքիայի առողջապահության նախարարության ենթակայության տակ գտնվող Թուրքիայի առողջապահության ինստիտուտի (TÜSEB) հետ համատեղ: Կլինիկական փորձարկումների երրորդ փուլի առաջին պատվաստանյութերը կամավորներին հանձնվել են հունիսի 22-ին Անկարայի քաղաքային հիվանդանոցում: Turkovac-ը նոր կորոնավիրուսի դեմ առաջին թուրքական ինակտիվ պատվաստանյութն է: