Օբամեյանգն առաջիկա հանդիպումներում չի օգնի «Արսենալին»

Լոնդոնի «Արսենալի» իսպանացի գլխավոր մարզիչ Միկել Արտետան պատմել է թիմի գաբոնցի հարձակվող Պիեր-Էմերիկ Օբամեյանգի վիճակի մասին։ Նա վնասվածքի պատճառով բաց կթողնի առաջիկա հանդիպումները։

«Օբամեյանգը սրունքի մկանի վնասվածք ունի։ Չգիտեմ՝ ինչքան բաց կթողնի։ Հավանաբար, երկու շաբաթ։ Ամեն ինչ կախված կլինի վերականգնվելու ընթացքից»,- Արտետայի խոսքը մեջբերում է «Արսենալի» մամուլի ծառայությունը։

Ընթացիկ մրցաշրջանում Օբամեյանգը լոնդոնյան թիմի հետ մասնակցել է 15 հանդիպման, խփել 5 գոլ, կատարել 1 գոլային փոխանցում։ «Արսենալն» արդեն 7 հանդիպում անընդմեջ հաղթանակ չի տարել։ Անգլիայի առաջնությունում թիմը 14 խաղից հետո 14 միավորով 15-րդ տեղում է։

14-րդ տուրում «Արսենալը» Լիվերպուլում 1։2 հաշվով պարտվեց «Էվերտոնին»։ Օբամեյանգը բաց թողեց այդ խաղը։ Հաջորդ տուրում, դեկտեմբերի 26-ին «Արսենալը» կընդունի «Չելսիին»։