«Տամբովի» ֆուտբոլիստները 3 ամիս աշխատավարձ չեն ստանցել

Ֆուտբոլի Ռուսաստանի Պրեմիեր լիգայում հանդես եկող «Տամբովի» ֆուտբոլիստներն արդեն 3 ամիս չեն ստանցել աշխատավարձ, հաղորդում է «Спорт-Экспресс»-ը:

Այդ կապակցությամբ ֆուտբոլիստները նամակ են ուղարկել մարզի նահանգապետ Ալեքսանդր Նիկիտինին ու ակումբի գլխավոր տնօրեն Օլգա Կոնովալովային: Նրանք խնդրել են վճարել հունիսի, հուլիսի և օգոստոսի աշխատավարձը: Խաղացողները նաև ցանկանում են բոնուսներ ստանալ նախորդ մրցաշրջանի համար:

Նամակը ստորագրել են 13 ֆուտբոլիստներ: Եթե խաղացողների պահանջը չկատարվի մինչև սեպտեմբերի 11-ը, ապա նրանք մտադիր են դադարեցնել համագործակցությունն ակումբի հետ, չներկայանալ մարզումներին ու բոյկոտել «Ուֆայի» դեմ Ռուսաստանի առաջնության հաջորդ տուրի հանդիպումը:

Հիշեցնենք, որ այս ամռանը «Սոչիից» «Տամբով» էր տեղափոխվել Հայաստանի հավաքականի հարձակվող Ալեքսանդր Կարապետյանը: Ռուսաստանի ընթացիկ առաջնության 6 տուրերում նա մասնակցել է 6 խաղի և դարձել 2 գոլի հեղինակ: