«Մարտիկ»-ը փակվեց. Վ.Պետրոսյանի մասնակցությամբ հաղորդումը ճակատագրական եղավ. armtimes.com

1994 թվականից բանակային առօրյան ներկայացնող «Մարտիկ» հաղորդաշարն այլեւս եթեր չի հեռարձակվում: Այս մասին հայտարարել է հաղորդման ռեժիսոր Արման Վարդանյանը: Հաղորդման ղեկավար Սեյրան Շահսուվարյանն Armtimes.com-ի հետ զրույցում ասաց, որ ինքը որեւէ խնդիր չունի: «Ինձ Նոր տարուց առաջ զանգահարեց Ռուբեն Ջաղինյանը (Հանրային հեռուստառադիոընկերության խորհրդի նախագահ, խմբ հեղ.), ասեց՝ շատ եմ ցավում, բայց հաղորդումը հանում ենք եթերից: Առանց պատճառաբանման: Քանի որ ես այդ ժամանակ մեկնում էի Հայաստանից, հիմա էլ տեղում չեմ, մինչ օրս չգիտեմ պատճառը»,- ասաց Սեյրան Շահսուվարյանը՝ շարունակելով, որ հաղորդման ռեժիսորը փորձել է ճշտել Հանրայինից, թե ինչու են հաղորդումը եթերից հանել եւ ստացել է պատասխան, որ նպատակահարմար չեն գտնում եթեր հեռարձակել:

Հարցին՝ կապ տեսնո՞ւմ եք դերասան Վարդան Պետրոսյանի մասնակցությամբ հաղորդման հետ, նա պատասխանեց. «Չէ, Նոր տարուց առաջ է եղել այդ խոսակցությունը: Դեկտեմբերի 26-27-ին է եղել այդ խոսակցությունը: Նկարել ենք ու ես գնացել եմ: Այդ հաղորդումը նկարել ենք դեկտեմբեր ամսին: Ես գնահատականներ չեմ ուզում դեռ տալ, որովհետեւ ես կոնկրետ շատ բանի չեմ տիրապետում, բայց ոչ մի բանի մեջ չի տեղավորվում, որովհետեւ «Մարտիկ»-ը ոչ քաղաքականություն է, ոչ զինվորականություն է, զուտ մտավորականների այց է զորամաս, նրա հետ ապրում է եւ այլն, գնում է դիրքեր, դիրքում հետը կանգնում է, վերջում էլ զորամասի հրամանատարության կողմից լավագույն զինվոր ճանաչված զինծառայողին լրացուցիչ արձակուրդի միջոցով բերում եւ հանձնում է զինվորին ծնողին»: Նրա խոսքով՝ «Մարտիկ»-ը բազմաթիվ հաղորդում է թողարկել, իսկ եթերից հանելու հարցն առաջարկում է տալ Ռուբեն Ջաղինյանին: Սեյրան Շահսուվարյանը այլ հեռուստաընկերությունների հետ դեռ քննարկում չի ունեցել հաղորդումը հեռարձակելու վերաբերյալ:

Հաղորդման ռեժիսոր Արման Վարդանյանը մեր զրույցում նշեց, որ հաղորդման ստեղծագործական խմբի համար անհասկանալի է ստեղծված իրավիճակը: «Եթե դու հաղորդման ռեժիսորն ես ու այդ հաղորդումն այդպես փակում են ի՞նչ գնահատական պետք է տամ, բնականաբար, բացասական, ոչ մի լավ բան չեմ կարող ասել»,- ասաց Արման վարդանյանը: Անդրադառնալով Վարդան Պետրոսյանի մասնակցությամբ հաղորդմանը, նա ասաց, որ հաղորդման նկարահանման գործընթացը դեռ ավարտված չի եղել, երբ որոշում է կայացվել փակել այն: Այլ մանրամասներ Արման Վարդանյանը չնշեց:

Այս թեմայով «Հանրային հեռուստաընկերության» հաղորդման մասնակիցների միջև ծեծկռտուք է տեղի ունեցել