Ռեալն ու Բարսելոնան շարունակում են պայքարը

Ավարտվեց ֆուտբոլի Իսպանիայի առաջնության 29-րդ տուրը: Առաջատարները՝ Բարսելոնան եւ Ռեալը կրկին հաղթանակներ տարան: Կատալոնցիները ոչ տպավորիչ խաղով 2:0 հաշվով հաղթեցին հետնապահներից մեկին՝ Լեգանեսին, իսկ Ռեալը գեղեցիկ խաղով 3:0 հաշվով հաղթեց Վալենսիային: Ռեալի կազմում գոլի եւ գոլային փոխանցման հեղինակ դարձավ Ասենսիոն, որը վնասվածքի պատճառով մեկ տարի չէր խաղում: Ընդ որում, գոլը նա խփեց խաղադաշտ մտնելուց վայրկյաններ անց: Իր հերթին Բենզեման դարձավ երկու գոլի հեղինակ:

Բարսելոնան պահպանում է Ռեալից ունեցած երկու միավորի տարբերությունը: Երրորդ տեղում գտնվող Սեւիլիան 11 միավորով հետ է մնում Ռեալից, բայց երկու միավորով առաջ է Մադրիդի Ատլետիկոյից: Չեմպիոնների լիգայում խաղալու համար շարունակում են պայքարը Խետաֆեն եւ Ռեալ Սոսիեդադը:

Վտանգավոր գոտում են Էյբարը, Սելտան, Մալյորկան, Էսպանյոլը եւ Լեգանեսը:

Top-News.am