Բունդեսլիգայում դորտմունդցիները 4:0 հաշվով հաղթեցին իրենց ոխերիմ մրցակիցներին՝ «Շալկեին»

Ֆուտբոլի Գերմանիայի առաջնությունը առաջինն էր եվրոպական թոփ-5 լիգաներից, որը վերադարձավ կորոնավիրուսի պանդեմիայով պայմանավորված դադարից հետո։

26-րդ տուրի շրջանակում Դորտմունդի «Սիգնալ Իդունա Պարկ» ստադիոնում «Բորուսիան» հյուրընկալել էր «Շալկեին»։

Լյուսիեն Ֆավրի գլխավորած թիմը 4 անպատասխան գնդակ ուղարկեց մրցակցի դարպասը ու վերադարձից հետո առաջին խաղում վստահ հաղթանակ տարավ։ Հանդիպման հաշիվը բացվեց 29-րդ րոպեին։ Տանտերերին առաջ մղեց Էրլինգ Հոլանդը։ Մինչև ընդմիջում Ռաֆայել Գերեյրոն կրկնապատկեց «Բորուսիայի» առավելությունը։

48-րդ րոպեին Թորգան Ազարը հաշիվը խոշոր դարձրեց։ 63-րդ րոպեին Ռաֆայել Գերեյրոն, գրանցելով Բունդեսլիգայում իր առաջին դուբլը, ձևակերպեց վերջնական հաշիվը՝ 4-0։

Այս արդյունքից հետո «Բորուսիան» միավորների քանակը հասցնում է 54-ի ու երկրորդն է մրցաշարային աղյուսակում։

Երեկ կայացած մյուս խաղերում  Աուգսբուրգը 2:1 հաշվով պարտվեց Վոլֆսբուրգին, Ֆորտունան եւ Պադերբորնը գոլեր չխփեցին, Հոֆենհայմը 3:0 հաշվով պարտվեց Հերտային, Լայպցիգը 1:1 խաղաց Ֆրայբուրգի հետ, Այնտրախտն էլ 3:1 հաշվով պարտվեց Մյունխենգլադբախին:

Հիշեցնենք, որ խաղերն անցկացվում են դատարկ մարզադաշտերում՝ առանց երկրպագուների:

Top-News.am