Զիդան․ Գվարդիոլան աշխարհի լավագույն մարզիչն է

Մադրիդի «Ռեալի» ֆրանսիացի գլխավոր մարզիչ Զինեդին Զիդանը խոսել է Անգլիայի չեմպիոն «Մանչեսթեր Սիթիի» կատալոնացի գլխավոր մարզիչ Խոսեպ Գվարդիոլայի եւ «Աթլետիկի» հետ առաջիկա դիմակայության մասին։

«Հարգում եմ Գվարդիոլային եւ ֆուտբոլիստի, եւ մարզիչի կարգավիճակում։ Ես նրան համարում եմ աշխարհի լավագույն մարզիչը։ Իհարկե, հավանում եմ հանդիպել նրա հետ եւ խաղալ նրա ղեկավարած թիմերի դեմ։

Ինչ վերաբերում է «Աթլետիկի» հետ դիմակայությանը, ապա մենք պատրաստ ենք ցուցադրել լավ խաղ։ Հերթական հանդիպումն է, հերթական փորձությունն է։ Տարվա վերջին խաղն է եւ պետք է 100 տոկոսով դրսեւորենք մեզ»,- Զիդանի խոսքը մեջբերում է Marca-ն։

Հիշեցնենք, որ «Ռեալն» ու «Մանչեսթեր Սիթին» կհանդիպեն Չեմպիոնների լիգայի 1/8 եզրափակիչում։

Իսպանիայի առաջնության 18-րդ տուրի «Ռեալ» - «Աթլետիկ» հանդիպումը տեղի կունենա դեկտեմբերի 22-ին։