«Լիվերպուլը» ցուցադրել է՝ ինչ տեսք է ունենալու «Էնֆիլդը» վերակառուցումից հետո (լուսանկարներ)

«Լիվերպուլն» իր պաշտոնական կայքում մանրամասներ է հրապարակել տնային «Էնֆիլդ» ստադիոնում առաջիկայում կատարվելիք վերակառուցման աշխատանքների վերաբերյալ:

Վերակառուցումը կիրականացվի Anfield Road տրիբունայում, որը դարպասներից մեկի հետևում է՝ հանրահռչակ «Քոպ» երկրպագուական տրիբունայի դիմաց: Ակումբը մտադիր է 7000-ով ավելացնել այդ տրիբունայի աթոռների քանակը, ինչի արդյունքում ստադիոնի ընդհանուր տարողունակությունը կհասնի 61 հազար հանդիսականի: Շինարարական աշխատանքները կսկսվեն 2020 թվականից ոչ շուտ:

«Լիվերպուլը» Պրեմիեր լիգայի ընթացիկ առաջնությունում կայացած 13 տուրից հետո վաստակել է 37 միավոր և զբաղեցնում է աղյուսակի 1-ին հորիզոնականը՝ մոտակա հետապնդող «Լեսթերին» գերազանցելով 8 միավորով: Յուրգեն Կլոպի գլխավորած թիմը հաջորդ՝ 14-րդ տուրում նոյեմբերի 30-ին սեփական հարկի տակ մրցելու է «Բրայթոնի» հետ: