Օզբիլիս. Ռուսաստանում ստիպված էի կենդանիների ձայները նմանակել, որպեսզի ռեստորանում բացատրեի ` ինչ եմ պատվիրել

«Վիլեմ II-ի» ֆուտբոլիստ Արաս Օզբիլիսը խոսել է Ռուսաստանում անցկացրած տարիների հիշողություններից:

«Ռուսաստանում անցկացրածս ժամանակաշրջանը լավագույնն էր իմ կարիերայում: Կյանքն այնտեղ իսկական արկած էր: Երբ ես առաջին անգամ ժամանեցի այնտեղ, մշակութային շոկ ապրեցի: Այժմ բավական լավ եմ խոսում ռուսերեն, բայց սկզբում ստիպված էի կենդանիների ձայները նմանակել, երբ ռեստորանում փորձում էի բացատրել՝ ինչ եմ ուզում պատվիրել:

Եթե հավ էի ցանկանում, նրան էի նմանակում: Մատուցողներն ինձ այնպես էին նայում, կարծես չափից շատ ալկոհոլ եմ օգտագործել»,- Օզբիլիսի խոսքերն է փոխանցում Elfvoetbal-ը:

28-ամյա հայ կիսապաշտպանը Ռուսաստանում երեք տարի է անցկացրել՝ 2012-2015թթ: Հասցրել է խաղալ «Կուբանում» ու Մոսկվայի «Սպարտակում»:

2018-ից Օզբիլիսը հանդես է գալիս հոլանդական «Վիլեմ II» ակումբում: Ընթացիկ մրցաշրջանում նա մասնակցել է Էրեդիվիզիայի 11 խաղի, խփել 1 գնդակ: