Մարչելո Լիպին հեռացավ Չինաստանի հավաքականից

Իտալացի հայտնի մասնագետ Մարչելո Լիպին հեռացել է ֆուտբոլի Չինաստանի ազգային հավաքականի գլխավոր մարզիչի պաշտոնից, հայտնում է Չինաստանի ֆուտբոլի ֆեդերացիայի կայքը։

Ասիայի Գավաթի խաղարկության քառորդ եզրափակիչում չինացիները 0:3 հաշվով պարտվեցին Իրանի հավաքականին եւ դուրս մնացին մրցաշարից:

Այդ հանդիպումից հետո 70-ամյա մասնագետը հայտնել է, որ 2019 թվականին կարող է ավարտել կարիերան: Մարչելո Լիպին 2016-ի հոկտեմբերին էր գլխավորել Չինաստանի հավաքականը՝ դառնալով աշխարհի ամենաբարձր վարձատրվող մարզիչներից մեկը:

Լիպին Չինաստանում աշխատել էր նաեւ 2012-2014-ը՝ գլխավորելով «Գուանչժոու Էվերգրանդը», որի հետ 3 անգամ դարձել է երկրի չեմպիոն եւ հաղթել Ասիայի Չեմպիոնների լիգայում։ 2006-ին Իտալիայի հավաքականը նրա գլխավորությամբ դարձել էր աշխարհի չեմպիոն:

Ասիայի գավաթի քառորդ եզրափակիչ մյուս խաղում ճապոնացիները մեծ դժվարությամբ 1:0 հաշվով հաղթեցին Վիետնամի ազգային թիմին եւ կիսաեզրափակիչում կհանդիպեն իրանցիներին:

Կիսաեզրափակիչ մյուս զույգը կձեւավորվի այսօր կայանալիք Հարավային Կորեա-Քաթար եւ ԷՄԷ-Ավստրալիա հանդիպումներից հետո:

Top-News.am