2018թ. տարեվերջյան միջոցառման համար ԱԳՆ-ն ծախսել է շուրջ 4 մլն դրամ

Հայաստանի արտաքին գործերի նախարարությունը նախորդ տարվա տարեվերջյան միջոցառումն անցկացրել է «Ֆլորենս» ռեստորանային համալիրում։ Այս մասին Tert.am-ի գրավոր հարցմանն ի պատասխան տեղեկացրել են ԱԳՆ լրատվության և հանրային դիվանագիտության վարչությունից:

Հայտնի է, որ «Ֆլորենս» ռեստորանը պատկանում է Հայաստանի նախկին վարչապետ Կարեն Կարապետյանին:

Միջոցառման անցկացման համար ծախսվել է 3 միլիոն 840 հազար դրամ:

«Տարեվերջյան միջոցառումը կազմակերպվել է 320 անձի համար, գումարը կազմել է 3840.0 հազ.դրամ, որը վճարվել է բյուջեով ՀՀ ԱԳ նախարարությանը հատկացված ներկայացուցչական ծախսերի հոդվածով խնայված միջոցներից»,- նշել են հարցման մեջ:

Միաժամանակ, արտաքին գերատեսչությունը հայտնում է, որ ԱԳ նախարարությունը 2018թ. ընթացքում ունեցել է 347 միլիոն դրամի տնտեսում, որը վերադարձվել է պետական բյուջե:

Նույն հարցերին ի պատասխան՝ ՊԵԿ տեղեկատվության և հասարակայնության հետ կապերի բաժնից հայտնել են, որ հաշվի առնելով ՊԵԿ կառուցվածքային ստորաբաժանումների բաշխվածությունը Հայաստանի ամբողջ տարածքով մեկ` 2018թ. տարեվերջյան միջոցառումներ անցկացվել են Հայաստանի տարբեր բնակավայրերում:

«Միջոցառումների անցկացման համար, հարցման համաձայն, պետական բյուջեից որևէ լումա չի ծախսվել»,- ասված է ՊԵԿ պատասխանում: