Առանց արտոնության ցույցերը ճնշվելու են. Ֆրանսիայի վարչապետ

Ֆրանսիայի վարչապետը երկուշաբթի գիշեր հայտարարել է, որ կառավարությունը ճնշելու է առանց արտոնության բողոքի ակցիաները:

«Ֆարս» լրատվական գործակալության հաղորդման համաձայն, Էդվարդ Ֆիլիպը, տեղեկացնելով բողոքարարներին դիմակայելու նպատակով Ֆրանսիայի անվտանգության կառույցի հզորացման մասին, հավելեց, որ կառավարությունը ծանր պատիժ է նկատի առել նրանց համար, ում նա «խռովարարներ» է անվանել:

Ֆրանսիայի վարչապետն այն պայմաններում է նման հայտարարություն կատարել, երբ այդ երկրի բողոքարարներին Ֆրանսիայի կառավարության տարեվերջյան նվերը 10 զոհ և ավելի քան 8000 վիրավորներ ու բերման ենթարկվածներ են եղել, որոնցից շատերի վիճակը մնում է անորոշ:

Ֆրանսիան 2018 թվականի նոյեմբերի 18-ից այդ երկրի կառավարության դեմ ժողովրդական բողոքների ականատես է:

Բողոքները նախ ուղղված էին Ֆրանսիայի նախագահ Էմանուել Մակրոնի տնտեսական և մասնավորապես վառելիքի ու հարկերի հետ կապված քաղաքականությունների դեմ, սակայն շուտով քաղաքական երանգ ստացան:

Բողոքարարները հավատացած են, որ Մակրոնի քաղաքականությունների պատճառով, ֆրանսիացի քաղաքացիների վրա ճնշումները խստացվել են և պահանջում են նրա հրաժարականը:

Ֆրանսիայի ձայնի և «Լը Ֆիգարո» օրաթերթի համար Odoxa հաստատության կազմակերպած վերջին հարցման արդյունքների համաձայն, ֆրանսիացիների երեք չորրորդը դժգոհ է Մակրոնի գործունեությունից: