Գիգզ. Մանչեսթեր Յունայթեդի շուրջ դրական մթնոլորտ է ստեղծվել

«Մանչեսթեր Յունայթեդի» նախկին կիսապաշտպան Ռայան Գիգզը խոսել է «կարմիր սատանաների»՝ Անգլիայի Պրեմիեր լիգայի 19-րդ տուրի շրջանակում «Հադերսֆիլդի» նկատմամբ տոնած հաղթանակի (3:1) մասին:

Հիշեցնենք, որ Ուլե-Գունար Սուլշերի՝ ՄՅՈւ-ի գլխավոր մարզչի պաշտոնում նշանակվելուց հետո սա թիմի երկրորդ անընդմեջ հաղթանակն էր:

«Ուլեի համար սա առաջին տնային հաղթանակն էր: Քարդիֆում տոնած հաղթանակից հետո բոլորը լավատեսությամբ էին սպասում այս խաղին:

Թիմը հիանալի հանդես եկավ և լավ արդյունքի հասավ: Կարծում եմ՝ ֆուտբոլիստներն էլ էին անհամբերությամբ սպասել այս խաղին: Այժմ նրանցից յուրաքանչյուրը ցանկանում է ցույց տալ իր հնարավորությունները. Պոգբան աչքի ընկավ գոլով, դե Խեան մի քանի սեյվ կատարեց, Ռաշֆորդն ավելի վստահ էր խաղում:

«Մանչեսթեր Յունայթեդի» շուրջ դրական մթնոլորտ է ստեղծվել, որը պետք է պահպանվի նաև «Բորնմութի» հետ առաջիկա խաղում»,- Գիգզի խոսքը մեջբերել է Manchester Evening News-ը:

Հավելենք, որ Պրեմիեր լիգայի 19-րդ տուրից հետո «Մանչեսթեր Յունայթեդն» ունի 32 միավոր և զբաղեցնում է մրցաշարային աղյուսակի 6-րդ հորիզոնականը: