Ռուսաստանը հետ է ուղարկել Թուրքիայից ներկրված 226 տոննա նարինջ ու մանդարին

Ռուսաստանի Դաշնության անասնաբուժական և բուսասանիտարական հսկողության դաշնային ծառայության (Россельхознадзор) որոշմամբ՝ Ռուսաստանից հետ է ուղարկվել Թուրքիայից ներկրված 226 տոննա նարինջ և մանդարին՝ ապրանքում միջերկրածովյան վնասատու միջատի հայտնաբերման պատճառով, տեղեկացնում է Мир24-ը:

Հայտնի է, որ Ռուսաստանի հարավի կլիմայական պայմանները թույլ են տալիս նման միջատների արագ բազմացումն ու տարածումը, ինչը չափազանց վտանգավոր է:

Ծառայությունից նշել են, որ Թուրքիայից ներկրվող ապրանքներում վերջերս հաճախ են հանդիպում նմանատիպ խախտումներ, ինչից ելելով՝ դեկտեմբերի 5-ից սկսած ռուսաստանյան կողմն առավել խիստ վերահսկողություն է սահմանել երկիր ներկրվող թուրքական ապրանքների նկատմամբ:

Շաբաթներ առաջ Ռուսաստանը հետ էր ուղարկել Թուրքիայից Նովոռոսիյսկի, Գելենջիկի և Տուապսեի նավահանգիստներ հասած 550 տոննա մանդարինը՝ ներկրված ապրանքում դրոզոֆիլա տեսակի միջատի հայտնաբերման պատճառով: