Կլաուդիա Շիֆերի շներն առանձնակի դաժան են

48-ամյա գերմանացի սուպերմոդել Կլաուդիա Շիֆերն արդեն չորրորդ անգամ ստիպված է մեծ տուգանք վճարել իր շան պատճառով, որը Նորթհեմփթոնշիր կոմսությունում հարձակվել է կենդանիների վրա։ Գերմանական գամփռը՝ Օսկարը, սպանել է հղի ոչխարին, ծանր վնասվածքներ հասցրել այլ կենդանիների։

 Կլաուդիա Շիֆերն ու նրա 47-ամյա ամուսին Մեթյու Վոնը համաձայնել են 3000 ֆունտ ստերինգի չափով՝ մոտավորապես 1.800.000 դրամ, տուգանք վճարել։ Հիշեցնենք, որ բացի գերմանական գամփռից՝ Կլաուդիա Շիֆերը եւս մեկ շուն ունի՝ իռլանդական գայլախեղդ, որին տվել են Ռոքսի անունը։

Սա առաջին դեպքը չէ. գյուղի բնակիչներից զույգի վերաբերյալ բողոքներ ստացվում են պարբերաբար։ Կենդանիները վախեցնում են գյուղի բնակիչներին։ Վկաները պնդում են, որ Օսկարը կծել է փոստարարին եւ հետապնդել եղնիկին։ Ռոքսին հարձակվել է Ջեկ Ռասելի ծեր շան վրա, որին Ռասելը զբոսանքի էր տարել թոռնուհու հետ։ Շունը լուրջ վնասվածքներ է ստացել. նրա կյանքը հաջողվել է փրկել վիրահատական միջամտության շնորհիվ, որը մի քանի հարյուր ֆունտ է արժեցել։ Գումարը վճարել են ամուսինները։

Շան տիրուհին բողոք է ներկայացրել ոստիկանություն, որն այցելել է Շիֆերին եւ Վոնին։ Նրանք պնդում են, որ շներն այժմ վերահսկողության տակ են։