«Ոչ ոք չգիտի՝ ինչ կա Պուտինի մտքին, այդ թվում՝ նաև ես». Թրամփ

Միացյալ Նահանգների նախագահ Դոնալդ Թրամփը, անդրադառնալով Ռուսաստանի Դաշնության ղեկավար Վլադիմիր Պուտինի հետ հանդիպման չեղարկմանը, նշել է, որ դա «ճիշտ ժամանակին» է արել:

«Ամերիկայի ձայն»-ին տված հարցազրույցում Թրամփը մանրամասնել է, որ Ռուսաստանի կողմից ուկրաինական երեք նավի վրա կալանք դնելը դատապարտելի է ու իրենք չեն կարող նման բան հանդուրժել:

Պատասխանելով լրագրողի հարցին առ այն, թե ինչու է Պուտինը նավերը կալանքի տակ առնելու հրաման տվել, Թրամփն ասել է.«Ոչ ոք չի կարող ասել՝ ինչ կա Պուտինի մտքին, այդ թվում՝ նաև ես»:

Թրամփի կարծիքով՝ Պուտինը գիտի՝ ինչ է ցանկանում անել, սակայն ԱՄՆ-ն չի կարող թույլ տալ, որ դա կատարվի:

«Ճիշտն ասած՝ հաշվի առնելով Ուկրաինայի հետ միջադեպը, չեմ կարծում, որ Պուտինի հետ հանդիպումը տեղին կլիներ: Բայց ամեն դեպքում մենք կհանդիպենք: Կարծում եմ՝ մենք շատ լավ հարաբերություններ ունենք ու հավատացած եմ, որ Ռուսաստանի հետ էլ շատ լավ հարաբերություններ ենք ունենալու: Նույն կարծիքին եմ նաև Չինաստանի հարցում: Դա չափազանց կարևոր է: Ուստի՝ մենք կհանդիպենք ճիշտ ժամանակին»,-եզրափակել է նախագահը:

Հիշեցնենք, որ նոյեմբերի 25-ի առավոտյան ՌԴ Անվտանգության դաշնային ծառայությունը հայտնել է Ուկրաինայի ռազմածովային ուժերին պատկանող նավերի կողմից ռուսական ջրային սահմանի խախտման մասին: Նշվում է, որ երեք ուկրաինական նավ ուղղություն է վերցրել դեպի Կերչի նեղուց՝ նախապես նավերի անցման համար համապատասխան դիմում չներկայացնելով:

Արդյունքում ռուսական կողմը բեռնանավերով փակել է նեղուցը: Բացի այդ, ռուսական սահմանապահ նավը վնասել է ուկրաինական քարշակին, որը հետևում էր նավերի խմբին:

Այնուհետև Ռուսաստանն Ուկրաինայի ռազմածովային ուժերի գործողությունների պատճառով Սու-25 օդանավերը հերթապահության է ուղարկել Կերչի նեղուցի շրջանում:

Կիևը Մոսկվային մեղադրել է բացահայտ ագրեսիվ գործողություններ կատարելու համար: Կիևը նաև հայտնել է Ռուսաստանի կողմից իր նավերի ուղղությամբ կրակ բացելու ու նավերը գրավելու մասին: Ուկրաինայի ռազմածովային ուժերի փոխանցմամբ՝ ռուս սահմանապահները նավերը կանգնեցրել են զենքի կիրառմամբ: Դրա հետևանքով վիրավորվել է 3 ուկրաինացի զինծառայող: