Բախումներ Փարիզում ոստիկանների եւ «դեղին բաճկոնների» միջեւ. կալանավորվել է 24

Փարիզի ոստիկանությունը հայտնել է «ուլտրաաջ» եւ «ուլտրաձախ» ուժերին ներկայացնող «դեղին բաճկոնների» հետ բախման հետեւանքով 24 մարդու կալանավորման մասին, հայտնում է Reuters-ը:

Ֆրանսիայի ոստիկանությունը կիրառել է արցունքաբեր գազ, աղմկային նռնակներ եւ ջրանետներ, երբ բենզինի գների բարձրացման դեմ բողոքող ցուցարարները Ելիսեյան դաշտերում փորձել են ճեղքել անվտանգության պատնեշը:

Փարիզում ցույցերի պատճառով փակվել են մետրոյի 7 կայարաններ:

Ավելի վաղ Ֆրանսիայի ֆինանսների նախարար Բրյունո Լե Մերը հայտարարել էր, որ «դեղին բաճկոնների» բողոքի ցույցերը ֆրանսիական տնտեսությանը լուրջ վնաս են հասցրել:

«Դեղին բաճկոններ» շարժումը վառելանյութի գների բարձրացման դեմ մի քանի զանգվածային ցույցեր է անցկացրել: Նոյեմբերի 24-ին ցույցերին մասնակցել է 23 հազար մարդ, որից 8 հազարը՝ Փարիզում: