Ուկրաինան մտադիր է դիմել միջազգային հանրությանը Բոսֆորի նեղուցը ռուսական նավերի համար փակելու հարցով

Ուկրաինայի իշխանությունները մտադիր են դիմել միջազգային հանրությանը Բոսֆորի նեղուցը ռուսական նավերի համար փակելու հարցով, այս մասին հայտարարել է Ուկրաինայի ռազմածովային ուժերի հրամանատար Իգոր Վորոնչենկոն, գրում է «УНИАН» գործակալությունը:

«Ես՝ որպես Ռազմածովային ուժերի հրամանատար, խնդրում և վստահություն եմ հայտնում, որ միջազգային հանրությունը, ամեն դեպքում, կընդունի որոշումն ու այն, որ Ուկրաինա պետության դեմ ագրեսիա է իրականացվել», - ասել է Վորոնչենկոն:

Բոսֆորի և Դարդանելի նեղուցներով նավագնացությունն իրականացվում է Մոնտրյոյի 1936 թվականի կոնվենցիայի համաձայն: Ըստ այդ փաստաթղթի՝ խաղաղ ժամանակ Սև ծովի ավազանի երկրներն իրավունք ունեն այս նեղուցներով անցկացնել ցանկացած տեսակի ռազմական նավ՝ այդ մասին նախապես տեղյակ պահելով Թուրքիայի իշխանություններին: Նեղուցը Թուրքիան կարող է փակել միայն պատերազմի ժամանակ, ընդ որում՝ պատերազմող կողմերի համար:

Հիշեցնենք, որ նոյեմբերի 25-ի առավոտյան ՌԴ Անվտանգության դաշնային ծառայությունը հայտնել է Ուկրաինայի ռազմածովային ուժերին պատկանող նավերի կողմից ռուսական ջրային սահմանի խախտման մասին Կերչի նեղուցում: Արդյունքում ռուսական կողմը բեռնանավերով փակել է նեղուցը:

Ռուսաստանն Ուկրաինայի ռազմածովային ուժերի գործողությունների պատճառով Սու-25 օդանավերը հերթապահության է ուղարկել Կերչի նեղուցի շրջանում:

Կիևը Մոսկվային մեղադրել է բացահայտ ագրեսիվ գործողություններ կատարելու համար: Կիևը նաև հայտնել է Ռուսաստանի կողմից իր նավերի ուղղությամբ կրակ բացելու ու նավերը գրավելու մասին:

Միջադեպից հետո Ուկրաինայում հայտարարվել է ռազմական դրություն: