Աշխարհի չեմպիոն Մագնուս Կարլսենը երրորդ անգամ պաշտպանեց տիտղոսը

Շախմատի աշխարհի չեմպիոն, համաշխարհային դասակարգման առաջատար, 27-ամյա նորվեգացի Մագնուս Կարլսենը երրորդ անգամ պաշտպանեց տիտղոսը: Լոնդոնում տեղի ունեցած չեմպիոնական մրցամարտի թայ-բրեյքում Կարլսենը 3:0 հաշվով պարտության մատնեց ամերիկացի Ֆաբիանո Կարուանային: Երրորդ պարտիայում Կարլսենը սպիտակներով հաղթեց 51-րդ քայլում:

Թայ-բրեյքը նշանակվել էր 12 դասական պարտիաներում միայն ոչ ոքի խաղալուց հետո:

Կարլսենը կստանա 550 հազար եվրո, Կարուանան՝ 450 հազար:

Հիշեցնենք, որ աշխարհի 16-րդ չեմպիոն Մագնուս Կարլսենը տիտղոսը նվաճել է 2013 թվականին՝ հաղթելով հնդիկ Վիշվանաթան Անանդին: 2014-ին Կարլսենը առաջին անգամ պաշտպանեց տիտղոսը Անանդի հետ մրցամարտում: 2016-ին նորվեգացի գրոսմայստերը չեմպիոնական մրցամարտում հաղթեց ռուսաստանցի Սերգեյ Կարյակինին՝ երկրորդ անգամ պաշտպանելով տիտղոսը: