Թրամփը կարող է չեղարկել Պուտինի հետ հանդիպումը

ԱՄՆ նախագահ Դոնալդ Թրամփը հայտարարել է, որ Կերչի նեղուցում տիրող իրավիճակի պատճառով կարող է չեղարկել ՌԴ նախագահ Վլադիմիր Պուտինի հետ հանդիպումը, որը նախատեսվում անցկացնել Արգենտինայում կայանալիք G20-ի գագաթնաժողովի շրջանակներում:

Ինչպես փոխանցում է TACC-ը, Միացյալ Նահանգների նախագահն ընդգծել է, որ սպասում է միջադեպի հետ կապված «լիարժեք զեկույցին», որը պետք է ներկայացնի նախագահի ազգային անվտանգության հարցերով զբաղվող թիմը:

«Այն (զեկույցը – Tert.am) բավական որոշիչ նշանակություն կունենա», - ասել է Թրամփը The Washington Post թերթին տված հարցազրույցում՝ հավելելով. «Գուցե ես հանդիպում չունենամ (Պուտինի հետ – Tert.am): Ինձ դուր չի գալիս այդ ագրեսիան: Ես առհասարակ ագրեսիա չեմ ուզում»:

Հիշեցնենք, որ ավելի վաղ Սպիտակ տան մամուլի քարտուղար Սառա Սանդերսը հայտնել է, որ ԱՄՆ նախագահ Դոնալդ Թրամփն Արգենտինայում կայանալիք G20-ի գագաթնաժողովի շրջանակներում երկկողմ բանակցություններ կվարի ռուս գործընկերոջ՝ Վլադիմիր Պուտինի հետ: Նշվում է, որ գագաթնաժողովի շրջանակներում նախագահն ու պատվիրակությունը կհամագործակցեն բազմաթիվ ղեկավարների հետ: Նախատեսվում են երկկողմ հանդիպումներ Արգենտինայի ու Ռուսաստանի նախագահների, Ճապոնիայի վարչապետի և Գերմանիայի կանցլերի հետ: