Մեքսիկայում հարյուրավոր ներգաղթյալներ են ձերբակալվել

Մեքսիկայի Տիխուանա և Մեխիկալի քաղաքների շրջանում՝ ԱՄՆ սահմանի մոտ, 5.600 հոնդուրասցի, գվատեմալացի և սալվադորցի ներգաղթյալներ են կենտրոնացել:

Մեքսիկայի Չիապաս նահանգի իշխանությունները երեկ ներգաղթյալների հերթական «քարավանից» մոտ 600 մարդու են ձերբակալել: Այս մասին հաղորդում է Korrespondent.net-ը՝ Foro TV հեռուստաալիքին հղումով:

Ըստ նախնական տվյալների՝ Մեքսիկայի միգրացիայի ազգային ինստիտուտի և դաշնային ոստիկանության աշխատակիցները ձերբակալություններն իրականացրել են այն բանից հետո, երբ ներգաղթյալները հրաժարվել են երկրում մնալու և ապաստան ստանալու համար անհրաժեշտ փաստաթղթեր խնդրել:

Ավելի վաղ տեղեկացվել էր, որ Սալվադորից ներգաղթյալների ևս մի «քարավան» է հասել Մեքսիկայի տարածք:

Հիշեցնենք, որ Կենտրոնական Ամերիկայից Մեքսիկայի տարածքով դեպի ԱՄՆ է շարժվում ներգաղթյալների մի քանի «քարավան»: Ամերիկյան իշխանությունները հայտարարել են, որ չեն ընդունի ապօրինի ներգաղթյալներին, և ուժեղացրել են սահմանին անվտանգությունը: