Ինչպես պետք է մայիսի 31-ին իրենց օրն անցկացնեն Պուտինը, Փաշինյանը, Շակիրան, Նազարբաեւը եւ մյուսները

Լրատվամիջոցները համառորեն իրենց ընթերցողներին առաջարկում են հետեւել աստղագուշակներին, մոռանալով, որ իրենց գրածը վերաբերում է նաեւ քաղաքական գործիչներին, պետության ղեկավարներին, հայտնի դերասաններին կամ երգիչներին: Եւ ահա, թե ինչ կլինի, եթե նրանք՝ Նիկոլ Փաշինյանը, Մակրոնը, Թրամփը, Պուտինը եւ մյուսները հետեւեն աստղագուշակների խորհրդին: Վերցնենք հայաստանյան ամենահայտնի լրատվամիջոցներից մեկի հրապարակած աստղագուշակը եւ տեսնենք, թե ինչ կլինի, եթե աշխարհում բոլոր-բոլորը, այդ թվում եւ հայտնի դեմքերը հետեւեն աստղագուշակների խորհուրդներին:  

ՀՀ նախագահ Արմեն Սարգսյանը ամեն ինչ պետք է անի վաղ արթնանալու համար եւ մանրակրկիտ նախապատրաստվի տանից դուրս գալուն: Նախապես պետք է ծրագրի գործերը, առավելագույնս ուշադիր լինի, քանի որ մեծ է հավանականությունը, որ ինչ-որ կարեւոր բան կարող է մոռանալ:

Ֆրանսիայի նախագահ Էմանուել Մայկրոնը, պարզվում է, սիրում է երկար մնալ անկողնում: Օրը նա անհոգ պետք է սկսի: Դրա համար լուսաբացին նա պետք է պատրաստվի արդեն այսօր, բնականաբար, հագուստ ընտրելով եւ հավաքելով պայուսակը: Եւ ոչ մի դեպքում նա չպետք է այս հարցում օգնություն խնդրի կնոջից՝ Բրիժիտից:

Նիկոլ Փաշինյանը պետք է հնարավորինս վաղ արթնանա: Քնելու ցանկության դեմ պայքարելու համար խնձոր ուտի, բայց սուրճ չխմի: Խնձորը նյութեր է պարունակում, որը կոֆեինից ավելի լավ է առույգացնում: Մնում է, որ Փաշինյանը չտրվի գայթակղությանը եւ հրաժարվի ամեն տեսակ սրճերից, նույնիսկ, երբ առաջարկի հեղինակն Աննան լինի:

Նուրսուլթան Նազարբաեւը՝ Ղազախստանի նախագահը պետք է օրվա ծրագիր կազմի: Երբ Նազարբաեւն ինչ-որ բան մոռանում է, խնդիրները կուտակվում են, իսկ դա նրան խանգարում է մյուս գործերին հետեւել:

Հունաստանի վարչապետ Ալեքսիս Ցիպրասին օրը լավ սկսելու համար այլ մարդ է պետք, չի խանգարի նաեւ ծրագրել օրը: Նա դժվարությամբ է արթնանում, մշտապես ինչ-որ բան մոռանում է: Այդ ցրվածությունը կարող է շտկել Պերիստերան՝ կինը, որը կօգնի պատրաստվել աշխատանքի գնալ: 

Բելառուսի երկարամյա առաջնորդ Ալեքսանդր Լուկաշենկոն օրը պետք է սկսի դրական տրամադրությամբ: Այդպես նա կարող է իրեն ենթարկել հաջողությունը: 

ՌԴ նախագահ Վլադիմիր Պուտինն օրը պետք է առույգ սկսի, եւ որ ամենակարեւորն է՝ ինքն իրեն օգնի արթնանալ: Իսկ արթնանալու արդյունավետ մեթոդներ պետք է ուսումնասիրի արդեն այսօր: Պուտինն օրը պետք է սկսի մարմնամարզությամբ կամ կոնտրաստային ցնցուղ ընդունելով: Իսկապես, կոնտրաստային ցնցուղը շատ կարեւոր է հսկա երկիրը ղեկավարելու համար:

Իրանի նախագահ Հասան Ռուհանին մայիսի 31-ին պետք է արթնանա եւ օրը սկսի ամենակարեւոր գործերով: Երեկոյան ժամերի համար հնարավորինս քիչ բան թողնի: Սա գլխավոր կանոնն է Իրանի նախագահի համար:

Բրեդ Փիթի համար սիրած երաժշտության հնչյունների ներքո արթնանալն ու օրը սկսելը լավագույն տարբերակն է: Լրացուցիչ օգնություն կարող է լինել վազքը կամ մարմնամարզությունը: Ահա թե ինչ քիչ բան է պետք է աշխարհահռչակ դերասան լինելու համար:

Իլհամ Ալիեւի՝ Ադրբեջանի առաջնորդի համար կարեւորը լռությունն է: Ոչ ոք չպետք է նրան խանգարի կամ ձանձրացնի իր խնդիրներով՝ նույնիսկ Մեհրիբան խանումը: Ալիեւը պետք է ձգտի առավոտյան խուսափել ընտանիքի անդամների հետ կոնֆլիկտներից, ինչպես նաեւ անհարկի ռիսկերից: Համաձայնեք, դժվար է խուսափել Մեհրիբանի հետ կոնֆլիկտից խուսափելուց:

Շակիրան պետք է զբաղվեք անձնական խնդիրներով, թեեւ դժվար է պատկերացնել, որ նա դրանցից ունի: Օրն արդյունավետ դարձնելու միակ հնարավորությունը դժվար գործերը հետոյին թողնելն է: Ռիսկի չպետք է դիմի եւ հավաք լինի, չնայած դա եւս դժվար է պատկերացնել: 

Թուրքիայի նախագահ Ռեջեփ Թայիփ Էրդողանին առավոտյան քիչ բան է պետք, նույնիսկ այս նախընտրական շրջանում: Նրա համար գլխավորն առանձնանալու եւ մտերիմների ուշադրություններից իրեն ազատելու հնարավորության մեջ է: Միայնությունն Էրդողանի  համար խնդիրներից փրկություն է, իսկ դա նշանակում է, որ գոնե մի քանի րոպե մենակ մնալը պարզապես անհրաժեշտություն է: Մնում է, որ նրա կինը՝ Էմինեն նրան չկասկածի եւ հիմար բաներ չմտածի, երբ ամուսինն առանձնանա: