Ինչպես 51 տարեկանում 30-ի տեսք ունենալ. Սինդի Քրոուֆորդի գեղեցկության գաղտնիքները (լուսանկարներ)

Աշխարհի ամենագեղեցիկ կանանցից մեկը՝ Սինդի Քրոուֆորդը, որը նախկինում ամենապահանջված սուպերմոդելներից էր, մինչև հիմա պահպանել է անթերի կառուցվածքն ու դեմքը: Թեև «պոդիումի թագուհին» արդեն 51 տարեկան է, սակայն շատերը կհամաձայնեն, որ նա 30-ի տեսք ունի:

The Cut ամսագրի հետ զրույցում երկու երեխայի մայրը պատմել է մարմնի խնամքի, մարզումների, առողջ ապրելակերպի մասին:

«Ես ապրում եմ Մալիբուում՝ լողափի մոտ, ուստի՝ արթնանալուց հետո առաջին բանը, որ անում եմ՝ դուրս գնալն է: Նայում եմ օվկիանոսին, արևածագին և այսպես ամեն առավոտ: Դա օրվա այն հատվածն է, երբ ինձ որևէ մեկը չի անհանգստացնում, և ես կարող եմ տրամադրվել օրվան: Շաբաթվա ընթացքում ես անպայման խմում եմ մի քանի սմուզի: Սովորաբար, խառնում եմ նշի կաթը, բանանը, սպանախը, դաղձը, կակաոն, ճապոնական մատչա թեյը ու պրոտեինը»,-պատմել է Քրոուֆորդը:

Ինչ վերաբերում է մարզումներին, ապա մոդելը 20 րոպե տրամադրում է կարդիո և ուժային վարժություններին:

«Մենք տնից դեպի լողափ տանող աստիճան ունենք, և ես դրանով վազում եմ 20 րոպե: Հետո անում եմ պարզ վարժություններ, որոնք գիտեմ դեռևս մանկուց»,-նշել է Քրոուֆորդը:

Մոդելը խոստովանել է, որ կյանքում շատ է կարևորում հավասարակշռությունը:

«Իմ կյանքում հավասարակշռությունն այն է, երբ կարողանում եմ ժամանակ տրամադրել ընկերներիս, ընտանիքիս, բարեգործությանը, ինքս ինձ ու աշխատանքիս: Երբ զգում եմ, որ ժամանակը ճիշտ եմ բաշխում, ինձ հրաշալի եմ զգում»,-ասել է մոդելը:

Անդրադառնալով արտաքինին՝ նա նշել է, որ տարիքի հետ մաշկի, մազերի որակը և առհասարակ մարմինը փոխվում է:

«Ես ինձ հետևում եմ, բայց միևնույն ժամանակ հասկանում եմ, որ 51 տարեկան եմ ու հիմա լավ տեսք պահպանելն ավելի դժվար է: Բայց կարծում եմ, որ կանայք պետք է պակաս քննադատական վերաբերմունք ունենան իրենց նկատմամբ»,-նշել է նա:

Ինչ վերաբերում է սննդին, ապա Քրոուֆորդի սննդակարգի 80%-ն առողջ սնունդ է: Նա նախընտրում է յուղոտ ձուկ, բանջարեղեն ու սպիտակուցային մթերքներ, բայց միևնույն ժամանակ ի վիճակի չէ վերջնականապես հրաժարվել պիցցայից:

«Երբ մարդիկ հարցնում են գեղեցկության գաղտնիքների մասին, ասում եմ, որ ոչ մի գաղտնիք էլ չկա: Մենք առանց այդ էլ ամեն ինչ գիտենք՝ բավարար քուն, շատ ջուր ու հրաժարում ծխախոտից»,-եզրափակել է գեղեցկուհին: