«Բավական է ծափահարեք». «Գրեմմի»-ի ժամանակ Բեյոնսեի և Ջեյ Զիի դստեր մասնակցությամբ տեսանյութը զվարճացրել է օգտատերերին (տեսանյութ)

Հունվարի 28-ին Նյու Յորքի «Մեդիսոն Սքուեր Գարդեն» համալիրում կայացել է ամենամյա «Գրեմմի» երաժշտական մրցանակաբաշխությունը, որի ժամանակ հեղինակավոր մրցանակին են արժանացել երաժշտական ոլորտի ամենատարբեր ուղղությունները ներկայացնող տասնյակ հայտնիներ:

Ինչպես նշում է The Daily Mail-ը, հաղթողներին, մասնակիցների ելույթները քննարկելուց զատ՝ համացանցի օգտատերերն ուշադրություն են դարձրել մրցանակաբաշխության ընթացքում արված ուշագրավ տեսանյութին՝ ռեփեր Ջեյ Զիի ու երգչուհի Բեյոնսեի ավագ դստեր մասնակցությամբ:

Դրանում երևում է՝ ինչպես է ծնողների մեջտեղում նստած Բլյու Այվին ձեռքի հանդարտ շարժումով խնդրում ծնողներին դադարել ծափ տալ, ու աստղային ծնողները նրան ուշադիր լսում են:

«Բլյու Այվին ընդամենը 6 տարեկան է, բայց արդեն կառավարում է ծնողներին: Նա այնքան զիլ է: Պաշտում եմ նրան»,-գրել է օգտատերերից մեկը:

Աղբյուրը հավելում է, որ աստղային ընտանիքը նախընտրել է հետևի մուտքով դահլիճ մտնել ու չի անցել հանդիսավոր կարմիր գորգով: Սակայն դա չի խանգարել Բեյոնսեին ամենայն լրջությամբ նախապատրաստվել միջոցառմանը: Հայտնի է, որ երգչուհին երեկոյի ընթացքում կրել է 6.8 մլն դոլարի շքեղ զարդեր: