Չինաստանը որոշել է կիսով չափ կրճատել բրիտանական վիսկիի ներկրման մաքսատուրքը

Չինաստանի ղեկավարության և  Միացյալ Թագավորության վարչապետ Քիր Սթարմերի միջև կայացած բարձր մակարդակի հանդիպումները նոր փուլ են նշանավորում երկու պետությունների հարաբերություններում։ Կողմերը պաշտոնապես հայտարարել են երկարաժամկետ և հետևողական համապարփակ ռազմավարական գործընկերություն զարգացնելու հանձնառության մասին։ Այս համատեքստում որոշում է կայացվել վերսկսել անվտանգության ոլորտում բարձր մակարդակի երկխոսությունը և մինչև տարեվերջ անցկացնել մի շարք ինստիտուցիոնալ քննարկումներ, որոնք կընդգրկեն ռազմավարական, տնտեսական և ֆինանսական հարցերի լայն շրջանակ։

Տնտեսական գործակցության տեսանկյունից այցը բավական արդյունավետ է եղել. ստորագրվել են 12 միջկառավարական համագործակցության փաստաթղթեր, որոնք առնչվում են առևտրին, գյուղատնտեսությանը, մշակույթին և իրավապահ ոլորտին։ Գործարար աշխարհի համար հատկապես կարևոր նորություն է եղել այն, որ Չինաստանը որոշել է կիսով չափ կրճատել բրիտանական վիսկիի ներկրման մաքսատուրքը՝ 10-ից հասցնելով 5%-ի։ Բացի այդ, Լոնդոնում «Bank of China»-ի մասնաճյուղը կդառնա յուանի քլիրինգային երկրորդ բանկը Միացյալ Թագավորությունում, ինչը կխթանի երկկողմ ներդրումային հոսքերը։

Մարդկային շփումների և տեղաշարժի հեշտացման ուղղությամբ նույնպես էական տեղաշարժ է եղել։ Չինական կողմը հայտարարել է, որ դրականորեն կդիտարկի բրիտանացի զբոսաշրջիկների համար առանց վիզայի մուտքի հնարավորությունը։ Զուգահեռաբար, երկու երկրները պայմանավորվել են ստեղծել բարձր մակարդակի գործընկերություն կլիմայի և բնության պահպանության հարցերով, ինչպես նաև վերականգնել օրենսդիր մարմինների միջև փոխանակումները։ Չինաստանը պատրաստակամություն է հայտնել հյուրընկալել բրիտանացի խորհրդարանականներին՝ նրանց երկրի իրական պատկերին ծանոթացնելու նպատակով։