Հարյուրավոր մարդիկ հավաքվել են Մինեապոլիսի բողոքի ակցիայում՝ Ալեքս Փրեթիի մահվանից մեկ օր հետո

Կիրակի օրը, Մինեապոլիսում դաշնային գործակալների կողմից 37-ամյա Ալեքս Պրեթիի սպանությունից մեկ օր անց, քաղաքի կենտրոնում տեղի է ունեցել բողոքի ցույց ԱՄՆ ներգաղթի եւ մաքսային ծառայության (ICE) աշխատակիցների գործողությունների դեմ՝ արդարություն պահանջելով Պրեթիի եւ մոտ երեք շաբաթ առաջ սպանված Ռենե Գուդի համար։

BBC-ի թղթակիցը դեպքի վայրից հաղորդել է, որ քաղաքի կենտրոնում հավաքվել են հարյուրավոր մարդիկ՝ վանկարկելով «Կորիր, ICE»։ Նախորդներից տարբերվող բողոքի ցույցը, թղթակցի տեղեկացմամբ, ընդհանուր առմամբ խաղաղ է եղել։ Մի տղամարդ, որը խոսել է BBC-ի հետ՝ անունը չհրապարակելու խնդրանքով, ձեռքին պահել էր «Վետերաններն ICE-ի դեմ» գրությամբ պաստառը։  «Սա այն Ամերիկան ​​չէ, որի համար ես պայքարել եմ»,- ասել է նա։

Մինեապոլիսի բնակիչները կիրակի օրը հավաքվել էին նաեւ քաղաքի հարավային ծայրամասում, Պրեթիի սպանության վայրում տեղադրված ժամանակավոր հուշարձանի մոտ։ «Ես զայրացած եւ տխուր եմ այս կորստի համար,- AFP-ին ասել է տեղի բնակիչ Լյուսին։- Բայց ես չեմ վախենում մնալ եւ չեմ վախենում շարունակել պայքարել եւ պաշտպանել այն, ինչը ճիշտ է, նույնիսկ եթե դա վտանգի տակ է դնում իմ ֆիզիկական անվտանգությունը»։

Ինտենսիվ թերապիայի բաժանմունքի բուժեղբայր, 37-ամյա Ալեքս Պրեթին շաբաթ օրը սպանվել է քաղաքում գործակալների կողմից՝ ԱՄՆ նախագահ Դոնալդ Թրամփի՝ անօրինական ներգաղթի դեմ պայքարի արշավի շրջանակում։ Ներքին անվտանգության նախարարությունը նշել է, որ գործակալները կրակ են բացել ինքնապաշտպանության նպատակով՝ փորձելով զինաթափել Պրեթիին, սակայն ըստ այլ վկայությունների՝ նրա ձեռքին կարող էր հեռախոս, այլ ոչ թե ատրճանակ լինել։

Մինեապոլիսում ցուցարարները հայտարարել են, որ չեն դադարեցնի ներգաղթի ծառայության աշխատակիցների դեմ ցույցերը, մինչեւ նրանք չհեռանան քաղաքից։ ԱՄՆ նախագահ Դոնալդ Թրամփը կիրակի օրը Wall Street Journal-ին ասել է, որ ICE գործակալները «որոշ պահի» կհեռացվեն Մինեապոլիսից, բայց չի նշել, թե երբ դա կարող է տեղի ունենալ։

Թրամփը նաեւ կրկին քննադատել է տեղի իշխանություններին՝ կոչ անելով Մինեսոթայի նահանգապետ Թիմ Ուոլցին եւ Մինեապոլիսի քաղաքապետ Ջեյքոբ Ֆրեյին համագործակցել, «դիմադրելու եւ պառակտման, քաոսի եւ բռնության կրակը բորբոքելու փոխարեն»։ Truth Social-ում իր գրառման մեջ նա նաեւ Ռենե Գուդի եւ Ալեքս Փրեթիի մահը անվանել է «դեմոկրատների կողմից առաջացած քաոսի արդյունք»։

Ուոլցը մամուլի ասուլիսում նշել է, որ ինչ-որ մեկը պետք է պատասխանատվություն կրի տեղի ունեցածի համար եւ կրկին կոչ է արել Թրամփին դուրս բերել ICE գործակալներին Մինեապոլիսից։ «Սա շրջադարձային պահ է, Ամերիկա»,- ասել է նա։ «Մենք հավատում ենք խաղաղությանը եւ կարծում ենք, որ Դոնալդ Թրամփը պետք է դուրս բերի այս 3 000 գործակալներին, քանի դեռ նրանք էլի որեւէ մեկին չեն սպանել»։ ԱՄՆ-ում BBC-ի գործընկեր CBS News-ի հաղորդմամբ, որը հղում է կատարել տեղեկացված աղբյուրներին, Ալեքս Փրեթիի մահվան հետաքննությունը ղեկավարում է ICE հետաքննությունների բաժինը (HSI, Homeland Security Investigations))՝ ՀԴԲ-ի օգնությամբ։

Որոշումը, որ HSI-ին ղեկավարի հետաքննությունը, անսովոր է եւ հարցեր է առաջացրել դաշնային իրավապահ մարմինների ներկա եւ նախկին պաշտոնյաների շրջանում, քանի որ բաժինը սովորաբար նման գործերով չի զբաղվում, նշել է CBS-ը։