Թրամփը ստորագրել է ԱՄՆ պաշտպանական բյուջեն

Հինգշաբթի՝ դեկտեմբերի 18-ին, ԱՄՆ նախագահ Դոնալդ Թրամփը ստորագրել է 2026թ․ ֆինանսական տարվա Ազգային պաշտպանության ապահովման մասին օրենքը։ Այս մասին տեղեկացվել է Սպիտակ տան կայքում։ Թրամփի ստորագրած օրենքը նախատեսում է ռեկորդային՝ տարեկան 901 միլիարդ դոլարի ռազմական ծախսեր։

Դեկտեմբերի սկզբին Թրամփը կրկին հայտարարել էր, որ ԱՄՆ-ը այլեւս չի ծախսում իր սեփական միջոցները Ուկրաինային օգնելու համար։ Նրա խոսքով՝ ՆԱՏՕ-ն այժմ վճարում է ամերիկյան զենքի համար, մինչդեռ Վաշինգտոնը միջոցներ է ստանում դաշինքից։

Օրենքում շեշտադրվում է Եվրոպայի պաշտպանությունը։ Սպիտակ տանն արգելվում է Եվրոպայում զորքերի թիվը կրճատել 76 հազարից ցածր 45 օրից ավելի ժամկետով։ Արգելվում է նաեւ հիմնական ռազմական տեխնիկայի դուրսբերումը կամ տեղափոխումը։

Պաշտպանության մասին օրենքը նաեւ լիազորում է Բալթյան անվտանգության նախաձեռնությունը եւ 175 միլիոն դոլար է տրամադրում Լատվիայի, Լիտվայի եւ Էստոնիայի պաշտպանությանն աջակցելու համար։