Ֆրանսիայի ԱԳՆ-ն Վրաստանի նախագահի հետ քննարկել է ԵՄ-ին երկրի ինտեգրման հեռանկարները

Ֆրանսիայի արտգործնախարար Քեթրին Կոլոննան բանակցություններ է վարել Վրաստանի նախագահ Սալոմե Զուրաբիշվիլիի հետ, որոնց ընթացքում, ի թիվս այլ հարցերի, անդրադարձ է կատարվել Եվրամիությանը երկրի ինտեգրման հարցին, հայտնում է Ֆրանսիայի ԱԳՆ-ն։

«Մարտի 13-ին ԱԳ նախարարն ընդունել է Վրաստանի նախագահ Սալոմե Զուրաբիշվիլիին։ Նախարարը հայտարարել է, որ Ֆրանսիան աջակցում է Եվրամիությանը Վրաստանի ինտեգրման գործընթացին։ Նա ընդգծել է օրենքի գերակայության ամրապնդմանն ուղղված բարեփոխումների անհրաժեշտությունը՝ 2022 թվականի հունիսին Եվրահանձնաժողովի կողմից արված 12 առաջարկություններին համապատասխան, որպեսզի ԵՄ թեկնածուի կարգավիճակ ստանալու հնարավորություն ստանա»,- ասվում է երկուշաբթի օրը Ֆրանսիայի ԱԳՆ տարածած կոմյունիկեում:

Կոլոննան նշել է, որ Ֆրանսիան ողջունում է «օտարերկրյա գործակալների» մասին օրինագիծը հետ կանչելու վրացական կառավարության որոշումը, եւ կոչ է արել Վրաստանի իշխանություններին զգոն լինել բնակչության համախմբվածությանը սպառնալիքների հանդեպ։ Նախարարը նաեւ հայտարարել է Փարիզի եւ Թբիլիսիի միջեւ երկկողմ հարաբերությունների ամրապնդման իր մտադրության մասին։

Նախօրեին Վրաստանի վարչապետ Իրակլի Ղարիբաշվիլին հայտարարել էր, որ Վրաստանն արժանի է ԵՄ անդամակցության թեկնածուի կարգավիճակին, քանի որ երկրի իշխանությունները դրա համար անհրաժեշտ ամեն ինչ անում են։