Թուրքիայում երկրաշարժերից հետո ուժեղանում է իշխանություններից դժգոհությունը

Թուրքիայում երկրաշարժերից հետո ուժեղանում է իշխանություններից դժգոհությունը՝ փլատակների ոչ բավարար արագ հավաքման պատճառով, գրում է Bloomberg-ը:

Երկրի ղեկավարությանն ուղղված քննադատությամբ են հանդես եկել երկրաշարժից փրկվածները եւ ընդդիմադիր կուսակցությունների ներկայացուցիչները։ Նրանք պնդում են, որ ամբարձիչների եւ այլ ծանր տեխնիկայի ուղարկումը հետաձգելու հետեւանքով բաց է թողնվել մարդկանց փրկելու կարեւորագույն պահը։

Փորձագետները մտավախություն ունեն, որ փլատակների տակ թաղված են տասնյակ հազարավոր մարդիկ, ինչը նշանակում է, որ զոհերի թիվը, հավանաբար, կշարունակի աճել:

Բացի այդ, կառավարությունը մեղադրվում է այն բանի համար, որ չի կարողացել ապահովել շինարարական բումի ընթացքում որակի կանոնների պահպանումը, ինչը նույնպես հանգեցրել է զոհերի թվի աճին:

Երկրի նախագահ Ռեջեփ Էրդողանը փետրվարի 8-ին հայտարարել է, որ օգնության տրամադրման համար առկա բոլոր միջոցները մոբիլիզացվել են, իսկ հետո խոստովանել է, որ դժվարություններ են առաջացել ծանր ձմեռային պայմաններում բոլոր 10 տուժած նահանգներին շտապ օգնություն ուղարկելու հարցում:

Ընդդիմադիր Ժողովրդահանրապետական կուսակցության ղեկավար Քեմալ Քըլըչդարօղլուի այն հայտարարությունից հետո, թե անորակ շինարարությունը հանգեցրել է մեծ թվով զոհերի, եւ որ կառավարությունը վատնել է հարկատուների փողերը, որոնք նախատեսված էին նման աղետներին նախապատրաստվելու համար, երկրում ժամանակավորապես սահմանափակվել է Twitter-ի հասանելիությունը: