Մենք հնչեցնում ենք միասնականության զանգը հանուն Արցախի եւ Հայաստանի․ Գեղամ Մանուկյան

Սարդարապատում 104 տարի առաջ մղվեց կենաց-մահու պայքար հանուն փրկության․ հիմա նորից եկել է պայքարի ժամանակ հանուն Արցախի եւ Հայաստանի։ Այս մասին այսօր՝ ապրիլի 28, իր ուղերձում ասաց «Հայաստան» խմբակցության պատգամավոր Գեղամ Մանուկյանը։

«Սուրբ վայրից՝ Սարդարապատի բարձունքից, դիմում ենք ձեզ եւ հայտարարում իրազեկման երթի մեկնարկը դեպի Երեւան։ Անցնող օրերի ընթացքում տարբեր խորհրդանշական վայրերից սկսվել են մեր քայլերթերը։ Սկսվեց Տավուշից, որը միշտ եղել է հերոսական, բայց, ցավոք, իշխանությունն այս շաբաթներին չի խորշում խոսել տարածքային զիջումների մասին, բզիկ-բզիկ անել սահմանային Տավուշը։ Երկրորդ վայրը Տիգրանաշենը, Երասխի բարձունքներն էին։ 2018 թվականին, երբ մեր հայրենակիցները դուրս էին եկել փողոց, երբ իշխանության եկավ Փաշինյան, նույն օրերին թշնամին Երասխի մոտակայքում թշնամին առաջխաղացում ունեցավ։ Նույնիսկ այդ օրերին դրա մասին բարձրաձայնելը համարվում էր դավաճանություն, բայց դավաճանությունը հիմա էլ է շարունակվում, երբ իշխանությունը խոսում է Երասխում հայելային հետաքաշման մասին»,- նշեց նա։