Ափալ-թափալ տեսնենք՝ ում ինչ ա պետք, տանք․ Բրյուսելը սրա մասին էր. Աննա Մկրտչյան

Բոլոր այն մտավախությունները, որոնք կային, որոնք մեր հանրահավաքի ժամանակ բարձրաձայնվել են, ցավոք սրտի, դարձան իրականություն: Այս մասին, այսօր՝ ապրիլի 7-ին, ԱԺ-ում լրագրողների հետ զրույցում ասաց «Պատիվ ունեմ» խմբակցության պատգամավոր Աննա Մկրտչյանը՝ անդրադառնալով երեկ Բրյուսելում տեղի ունեցած Փաշինյան-Միշել-Ալիև եռակողմ հանդիպմանը և դրա արդյունքների վերաբերյալ հայտարարություններին:

«Այն հայտարարությունը, որը կա, վկայում է այն մասին, որ դա կլինի գրավոր, թե բանավոր, միեւնույն է Հայաստանի շահը չի պաշտպանվում: Միեւնույն է, Նիկոլը որտեղ էլ գնա, խնդիրը զիջելն է, զիջել այնքան, ինչքան պետք է իր իշխանությունը երկարաձգելու համար: Գնալ Բրյուսել եւ չխոսել, չստանալ գրավոր տեքստ, որ հայ ռազմագերիների հետ կապված, այն անօրինական դատավճիռների հետ կապված, որոնք Բաքվում կայացվում են ՀՀ քաղաքացիների նկատմամբ, նշանակում է մեկ բան՝ չունենալ այնտեղ ներկայացուցիչ, չունենալ այնտեղ մարդ, որը քո երկրի շահերն է պաշտպանում:

Գնալ Բրյուսել եւ չխոսել, չստանալ գրավոր տեքստ, որ ինչեւ հիմա Ադրբեջանի ագրեսիվ պատերազմական քաղաքականությունը, ՀՀ սուվերեն տարածքում զինվորականների եւ զորախմբեր տեղակայելով, հայ բնակչությանն ահբեկելով, Արցախում հումանիտար տեռոր ստեղծելով, այդ մենը նշանակում է, որ այնտեղ կան Հայաստանի բարեկամներ, Հայաստանի թշնամիներ, բոլորն ունեն ներկայացուցիչներ բացի Հայաստանից»,-հայտարարեց նա:

Աննա Մկրտչյանը նկատեց, որ հանդիպումից հետո տարածած հայտարարությունում չկա Արցախ, գոյություն չունի հայկական շահի մասին որեւէ հիշատակում. «Այնտեղ խոսքը հետեւյալի մասին է. եկեք ափալ-թափալ տարածքային ամբողջականության հարցը լուծենք, եկեք տեսեք՝ ինչ է մզնից պետք, ստացեք: Հայելային հետքաշումների մասին է խոսքը, երբ տեսանք, թե ինչ հետեւանքների է դա բերում: Սրա մասին էր Բրյուսելը: Ափալ-թափալ տեսնենք՝ ում ինչ է պետք, միայն ինքը չունենա անհրժեշտություն պաշտպանելու հայկական շահը»,-հայտարարեց ընդդիմադիր պատգամավորը:

Նա համոզմունք հայտնեց, որ երբ Նիկոլ Փաշինյանը ոտքը Հայաստանից դուրս է դնում, դա հայկական շահը ուրանալու մասին է:

Անդրադառնալով ընդդիմության հանրահավաքին, ՀՀԿ-ական գործիչն ասաց. «Ես վստահ եմ, որ հանրահավաքն իր նպատակին հասել է, առնվազն միջազգային հանրությանը մեսիջի մասով, որ հայ հասարակությունը համամիտ չէ այն հանգամանքին, որ Նիկոլը ուրանում է հայկական օրակարգը: Արձագանքները խոսնում են նրա մասին, որ իշխանություններն, այո, շատ անհանգստացած են: Ես անկեղծ կլինեմ ու կասեմ, որ իմ խորին համոզմամբ Նիկոլի ընթացքը կարող է կասեցվել միայն իր քաղաքական առումով բացակայությամբ»,-ասաց նա:

Ավելի վաղ NEWS.am-ը հայտնել էր, որ երեկ Բրյուսելում տեղի է ունեցել Նիկոլ Փաշինյանի, Եվրոպական խորհրդի նախագահ Շառլ Միշելի և Ադրբեջանի նախագահ Իլհամ Ալիևի եռակողմ հանդիպումը։ Հանդիպման արդյունքներով ձեռք է բերվել պայմանավորվածություն` 2021թ. նոյեմբերի 26-ին Սոչիում ձեռք բերված համաձայնության համաձայն` մինչև ապրիլի վերջ ստեղծել Հայաստանի և Ադրբեջանի միջև սահմանների դելիմիտացիայի հարցերով երկկողմ հանձնաժողով, որը օժտված կլինի նաև սահմանի երկայնքով անվտանգություն և կայունություն ապահովելու հարցերով զբաղվելու լիազորությամբ։

Նիկոլ Փաշինյանն ու Ադրբեջանի նախագահը Արտաքին գործերի նախարարներին հանձնարարել են մեկնարկել երկու երկրների միջև խաղաղության բանակցությունների նախապատրաստական աշխատանքները: