Պատերազմի այլընտրանքով մարդկանց վախեցնում են․Ադրբեջանը երբ ուզի, պատերազմի համար պատճառ կստեղծի․ պատգամավոր

Եթե Ադրբեջանն ուզի պատերազմ, դա կսարքի․ մի բեռնատար կպայթեցնեն, կասեն՝ հայերն են պայթեցրել․ ահա և քեզ պատերազմի պատճառ։ Ադրբեջանի ագրեսիվ քայլերի հետևանքով ստեղծված վիճակի շուրջ «Անվտանգություն եւ ժողովրդավարություն» ՀԿ-ի այսօր հրավիրած քննարկման ժամանակ ասաց «Հայաստան» խմբակցության պատգամավոր Արթուր Խաչատրյանը։

Պատգամավորը հիշեցրեց 2020թ․ նոյեմբերի 9-ի կապիտուլյացիոն համաձայնագրի հետ կապված Նիկոլ Փաշինյանի արդարացումը, որի շարունակությունը տեսնում ենք նաև այսօր․

«Հիշու՞մ եք՝ այդ համաձայնագիրը ոնց արդարացրեց․ ասում էր՝ եթե ես չստորագրեի, 20 հազար, հետո էլ թե՝ 35 հազար զոհ կունենայինք։ Հետո ասում էր՝ եթե մենք չգնանք դեմարկացիայի ու դելիմիտացիայի, ապա այլընտրանքը պատերազմն է։ Դրա մասին հայտարարեցին, բայց պատերազմը չվերջացավ»։

Ադրբեջանի հետ ինչ-որ պահի հարաբերությունները կարգավորելը, ըստ պատգամավորի, անընդունելի չէ, ուղղակի՝ ոչ խաղաղության համաձայնագրով, այլ՝ ինչ-որ արձանագրության հիման վրա դիվանագիտական հարաբերություններ հաստատելով։ Դա էլ, Խաչատրյանի խոսքով, մի պարագայում է կարելի․ եթե Ադրբեջանը ճանաչի Արցախի անկախությունն ու տարածքային ամբողջականությունը։

Պատերազմի այլընտրանքով մարդկանց վախեցնելով, պատգամավորի համոզմամբ, ներկա իշխանություններն իրենց քաղաքականությունն են առաջ տանում։