ՀՀ 3 նախագահները խոսել են ինքնորոշման իրավունքի մասին, իսկ այս իշխանությունը վախենում է անգամ արտաբերել դա. Ա. Մկրտչյան

Ես ցավում եմ, որ 2018-ի իշխանազավթումից հետո սրանք հասել են այն կարգավիճակին եւ իրենց իշխանության տեսանկյունից կայունության, որ կարողանում են արդեն բացահայտ ասել այն նպատակները, որոնց համար եկել էին իշխանության: Այս մասին NEWS.am-ի հետ զրույցում նշեց ԱԺ «Պատիվ ունեմ» խմբակցության պատգամավոր Աննա Մկրտչյանը:

«Երբ 2018-ին հիմնականում ՀՀԿ-ի ներկայացուցիչները փորձում էին հարցր բարձրացրել, որ սրանք, որ գալիս են, ի՞նչ են անելու Արցախի հետ կապված, նույն Նիկոլին երբ հարցնում էին, թե ինչ նպատակներ ունես, նա ասում էր՝ ես սկսելու եմ զրո կետից: Մինչ այդ զրո կետը մենք ունեինք հետաքննության մեխանիզմների արդեն բավարարված պայմաններ, որոնք պետք է ներդրվեին, մենք ունեինք Վիեննայի եւ Սանկտ Պետերբուրգի համաձայնությունները եւ ունեինք մի իրավիճակ, երբ Ալիեւն ասում էր, որ փակ դռների հետեւում իրեն ստիպում են ճանաչել Արցախի անկախությունը: Բացի այդ, ասում էր, նույնիսկ այդ կարգավորման պայմաններում Քելբաջարն ու Լաչինը ընդմիշտ մնալու էին հայկական վերահսկողության տակ:

Հետո եկան այս մարդիկ, ասացին՝ վերելակում խոսել են, ամեն ինչ նորմալ է, արդեն Մինսկի խումբն իրենց համար այդքան կարեւոր ու առաջնային չէ, որովհետեւ օպերատիվ կապ են հաստատել, կարողանում են Ալիեւի հետ խոսել, պարզվեց, որ Ալիեւը շատ կիրթ է ու կառուցողական: Հետո պարզվեց, որ Նիկոլը Ալիեւից է տեղեկանում բանակցային մեր ժառանգության վերաբերյալ»,-ասաց նա:

Աննա Մկրտչյանը հավելեց, որ այսօրվա իշխանությունները հստակ ասում են, որ Արցախի հարցն իրենց օրակարգում չէ. «Այս ուսապարկերն արդեն հայտարարում են, որ Արցախն Ադրբեջանի կազմում թողնելու հարցը պետք է քննարկման առարկա դառնա: Սա պատահական լեզվի սաթաքում չէ, սա հստակ գործունեության պլան է, թե ով որ ժամանակ ինչ հակահայկական արտահայտություններ պետք է անի, այդ արտահայտությունները պետք է դառնան մեր ներքաղաքական քննարկման թեմա, հետո էլ ասեն՝ մենք հո նորություն չենք ասում, դրա մասին հայտնել է ուսապարկերից մեկը: Այս մարդիկ մեզ ուղղակի այլընտրանք չեն թողնում, քան կոնսոլիդացվելու եւ ցույց տալու աշխարհին, ՄԽ համանախագահներին, որ էս մարդիկ հայ ժողովրդի անունից չեն խոսում, նրանք մեզ հետ կապ չունեն: Այս մարդիկ դավաճանություն են գործել պետական շահերի նկատմամբ»,-ընդգծեց ՀՀԿ-ական պատգամավորը:

Անդրադառնալով Ադրբեջանի կողմից առաջ քաշված 5 կետերին, Աննա Մկրտչյանն ասաց, որ այն փաստը, որ Ադրբեջանը պահանջում է ճանաչել Ադրբեջանի տարածքային ամբողջականությունը եւ երբեւէ տարածքային պահանջ չունենալ, խոսում է այն մասին, որ այս հարցը լուծված չի եղել. «Այսինքն ՀՀ երեք նախագահները խոսել են ինքնորոշման իրավունքի մասին, իսկ այսօրվա իշխանությունները վախենում են անգամ արտաբերել Արցախի ժողովրդի ինքնորոշման իրավունք արտահայտությունը: Ադրբեջանի կողմից այդ 5 կետերը խաղաղության հետ կապ չունեն, դրանք ուլտիմատումների հերթական փաթեթն են, որ ներկայացվել է Հայաստանին»:

Նա նաեւ հավելեց, որ իշխանություններից որեւէ մեկը արդեն բավական ժամանակ է չի խոսում, որ մենք հարյուրավոր գերիներ ունենք Ադրբեջանում, որ արցախահայության կյանքն ամեն վայրկյան վտանգի տակ է. «Հայաստանի ՊՆ-ն հայտարարում է, որ ադրբեջանցիները հետ են վերադառնում իրենց տարածքները: Սա ի՞նչ է, եթե ոչ ՀՀ շահին հարվածող հայտարարություն, որն արվում է իբր ՊՆ-ի կողմից»:

Ինչ վերաբերում է նրան, որ Սյունիքի մարզի Ներքին Հանդ գյուղի տարածքում ադրբեջանցիները մեկ կմ առաջ են եկել, Աննա Մկրտչյանն ասաց. «Իրենք շատ լավ գիտեն, որ այնտեղ, որտեղ թույլ կտան, որ ադրբեջանցին կանգնի, հետո ինչքան դեմարկացիա ու դելիմիտացիա ուզում ես արա, իրենք էնտեղից չեն գնա: Նիկոլը հիմա Ալիեւին ժամանակ է տալիս, որքան հնարավոր է իր զորքերը բերի առաջ, հայկական տարածքների գրավմամբ զբաղվի, հետո կասի՝ ժողովուրդ ջան, դե մենք մինչեւ դելիմիտացիայի, դեմարկացիայի մասին էինք խոսում, այնտեղ կանգնած են ադրբեջանցիները, դուք հո նոր պատերազմ չեք ուզում»:

Առավել մանրամասն՝ տեսանյութում