Թուրքիան ՌԴ-ին և Ուկրաինային տեղեկացրել է Մոնտրյոյի կոնվենցիայի 19-րդ հոդվածը կիրառելու մտադրության մասին

Թուրքիան կկիրառի Մոնտրյոյի կոնվենցիայի 19-րդ հոդվածը Դարդանելի և Բոսֆորի նեղուցներով ռազմանավերի անցման մասին. դրա մասին պաշտոնապես հայտնել են Ռուսաստանին և Ուկրաինային։ Այս մասին երեքշաբթի հայտարարել է Թուրքիայի արտգործնախարար Մևլութ Չավուշօղլուն Habertürk հեռուստաալիքին տված հարցազրույցում։

«Մենք որոշել ենք, որ այժմ պատերազմ է ընթանում։ Մենք պաշտոնապես ծանուցել ենք մասնակից երկրներին։ Մենք կկիրառենք Մոնտրյոյի կոնվենցիայի 19-րդ հոդվածը», - ասել է նա։

«Ռուսները վերջին անգամ ասել են, որ 4 նավ է մեկնելու փետրվարի 27-28-ը։ Դրանցից երեքը գրանցված չեն եղել Սև ծովի բազաներում։ Մենք ասել ենք՝ մի՛ ուղարկեք այս նավերը», - նշել է Չավուշօղլուն։

Միաժամանակ, Թուրքիայի ԱԳՆ ղեկավարը հայտարարել է, որ հանրապետությունը «բարեկամական կարգով» խնդրել է Ռուսաստանին՝ նեղուցներով նավեր չուղարկել ։ «Մոսկվան համաձայնել է»,- հավելել է նա։