Պուտինը մտադիր է պաշտոնապես դաշնակցային մակարդակի բարձրացնել Ադրբեջանի հետ հարաբերությունները

Փետրվարի 22-ին ՌԴ նախագահ Վլադիմիր Պուտինը բանակցություններ կվարի իր ադրբեջանցի գործընկեր Իլհամ Ալիեւի հետ, ով պաշտոնական այցով կգտնվի Ռուսաստանում, տեղեկացնում է Կրեմլի մամուլի ծառայությունը։

«Բանակցությունների արդյունքներով դաշնակցային փոխգործակցության մասին հռչակագիր կստորագրվի, որը Ռուսաստանի եւ Ադրբեջանի միջեւ հարաբերությունները կբարձրացնի դաշնակցային մակարդակի»,- ասվում է հաղորդագրության մեջ։

Կրեմլի տեղեկություններով՝ կողմերը մտադիր են քննարկել քաղաքական, առեւտրատնտեսական եւ հումանիտար ոլորտներում երկկողմ հարաբերությունների հետագա զարգացման հարցերի լայն շրջանակ։

«Բացի այդ, նախատեսվում է քննարկել 2020թ․ նոյեմբերի 9-ին, 2021թ․ հունվարի 11-ին եւ նոյեմբերի 26-ին Ռուսաստանի, Ադրբեջանի եւ Հայաստանի ղեկավարների միջեւ ԼՂ վերաբերյալ ձեռք բերված պայմանավորվածությունների կատարման ընթացքը, ներառյալ՝ Հարավային Կովկասում տնտեսական եւ տրանսպորտային կապերի վերականգնմանն ուղղված միջոցառումները»,- ասվում է հաղորդագրության մեջ։