Կորոնավիրուսը Վրաստանում․ վարակման 3842 նոր դեպք, 31 մարդ մահացել է

Վրաստանում անցած օրվա ընթացքում կորոնավիրուսով վարակման 3842 նոր դեպք է գրանցվել։ Այս մասին այսօր հայտնել է COVID-19-ի դեմ պայքարի օպերատիվ շտաբը, տեղեկացնում է «Նովոստի-Գրուզիան»։

Տվյալները ստացվել են ավելի քան 34 000 թեստերի հիման վրա։ Այսպիսով, մեկ օրում հայտնաբերման ցուցանիշը կազմել է 11,3%, վերջին երկու շաբաթվա ընթացքում՝ 7,45%, իսկ վերջին շաբաթվա ընթացքում՝ 9,17%։

Վրաստանում համավարակի սկզբից գրանցված կորոնավիրուսային վարակի դեպքերի ընդհանուր թիվը կիրակի առավոտյան ավելացել է մինչեւ 959 874։

Երկրում վերջին 24 ժամվա ընթացքում վարակվածների մոտ 55%-ը՝ 2059 դեպք, բաժին է ընկել Թբիլիսիին։ Աջարիայում գրանցվել է վարակի 474 դեպք, Իմերեթում՝ 437, Սամեգրելոյում եւ Զեմո Սվանեթիում՝ 179, Կախեթում՝ 146, Գուրիայում՝ 141, Քվեմո-Քարթլիում՝ 108, Մցխեթա-Մթիանեթում՝ 52, Սամցխե-Ջավախեթիում՝ 48, Ռաչա-Լեչխումում եւ Քվեմո Սվանեթիում՝ 11:

COVID-19-ից մահացել է եւս 31 հիվանդ։ Վրաստանում կորոնավիրուսից մահացածների ընդհանուր թիվը կազմում է 14 187։

Ապաքինվել է 777 մարդ, նրանց ընդհանուր թիվը հասել է 912 443-ի։

Վրաստանում այս պահին կա կորոնավիրուսի 33 218 ակտիվ դեպք։ Նրանցից 4418-ը (հիվանդների ընդհանուր թվի 13%-ը) բուժվում է հիվանդանոցներում։ 1089 պացիենտի վիճակը ծանր է, 275-ը միացված է արհեստական օդափոխության սարքերին։ 1493 մարդ բժիշկների հսկողության տակ է մնում քովիդ-հյուրանոցներում, իսկ 27 307-ը բուժվում է տնային պայմաններում։

Ավելի քան 28 200 քաղաքացի մնում է կարանտինային եւ ինքնամեկուսացման պայմաններում։